Reali, 5 gola për 5 “Topat e Artë” të Ronaldos

Në "Bernabeu" mjaftoi vetëm pjesa e parë për 3 pikët

Pesë "Topa të Artë" i ofroi Kristiano Ronaldo "publikut" të "Santiago Bernabeu"- t, përpara ndeshjes, por po aq ishin edhe golat e shënuar nga Reali i Madridit përballë Sevijes, që të gjithë në pjesën e parë. Madje, me suksesin e djeshëm, ata e ngushtuan në pesë pikë diferencën nga Barcelona, ndonëse katalanasit do të luajnë sot, në transfertë ndaj Vijarealit. Edhe pse pa Ramosin, Karvahalin e Kazemiron të skualifikuar, ashtu sikurse pa Varan e Bejl të dëmtuar, trajneri Zidan gjithsesi mori përgjigjet e duhura nga një skuadër e mbushur me të rinj, si Akrah, Naço, Vajeho, Vazkuez e Asensio. Shqetësimi se me gjithë këto mungesa, sfida me Sevijën do të ishte një malore e fortë, shuhet pas 131 sekondash kur Naço zhbllokon. Reali vendos që t'ia lërë kundërshtarëve që ta luajnë disi topin, por pa asnjë rrezik kur në të 23-ën, të zotët e shtëpisë dyfishojnë: Asensio gjen një asist magjik për Ronaldon që nuk fal. Madje, portugezi do të dyfishojë shumë shpejt me penallti dhe "CR7" feston dopietën personale, ndërsa rezultati shkon në 3-0. Mund të mjaftojë

me kaq?! Jo... Reali është i vendosur që të dëfrejë publikun e tij dhe shënon edhe dy herë të tjera, me Kros dhe me mbrojtësin e ri, Akraf, një bast i fituar i Zidan. Edhe pjesa e dytë shuhet pa shumë histori sepse Sevijës iu bllokuan këmbët dhe mendja, ndërsa "Bernabeu"

mjaftohet me një traversë të goditur nga Benzema dhe ovacionin ndaj Ronaldos pas zëvendësimit me Iskon. Kaq mjafton për të festuar tri pikët dhe "Topin e Artë" të Ronaldos, ndërsa nga dje, Reali u nis për në Emiratet Arabe, ku pret të luajë Botërorin për Klube.