Tomori, festa mund të kushtojë shtrenjtë
Klubi beratas u frikësohet incidenteve dhe u bën thirrje tifozëve: Ruani qetësinë në stadium!
Trajneri i Tomorit, Gersi Arbri, është duke iu dhënë udhëzimet e fundit skuadrës në prag të sfidës me Naftëtarin, e cila do të zhvillohet të shtunën, në orën 13:00, në stadiumin e Beratit. Kjo sfidë pritet të ketë një interes të dyfishtë te sportdashësit vendës për vetë faktin se ky takim konsiderohet si "derbi i vogël", që tashmë ka marrë përmasa mjaft të larta për shkak të "rivalitetit" që ka ndodhur në vitet e fundit. Mirëpo, ajo që është edhe më e rëndësishmja, ka të bëjë me inaugurimin e stadiumit, të cilit i është kryer një rikonstruksion i fushës, që ka zgjatur për afro 10 muaj. Gjithsesi, tashmë sportdashësit beratas janë të detyruar t'i gëzohen faktit se kjo "telenovelë" ka marrë fund dhe nuk do të hallakaten më duke udhëtuar për të ndjekur skuadrën e tyre jashtë qytetit përkatës. Në një komunikatë të bërë në faqen zyrtare të klubit në rrjetin social "Facebook", drejtuesit kanë shprehur pak a shumë atë që është thënë vetëm një ditë më përpara në artikullin e gazetës. "Stadiumi Olimpik i Tomorit është plotësisht gati për ndeshjen e fundjavës, ku skuadra jonë do të përballet në javën e 11të të Kategorisë së Parë me Naftëtarin, e cila konsiderohet edhe si derbi i prefekturës. Inspektori i FSHF-së, Eduard Gjini, pasi ka parë nga afër punimet, është shprehur se puna e zhvilluar ka qenë ajo e standardeve të larta dhe ky stadium i përmbush të gjitha kriteret e mundshme", thuhej fillimisht. Teksa më tej, drejtuesit e klubit u kanë thirrje tifozëve që të tregohen të matur në veprimet e tyre dhe të distancohen nga çdo incident i mundshëm. "U bëjmë thirrje tifozëve, të jenë në një numër sa më të lartë në duelin e kësaj jave, pasi mbështetja juaj do të jetë shumë e domosdoshme për ecurinë e skuadrës. Duke parë edhe 'rivalitetin' që është krijuar në këto dy vitet e fundit midis Tomorit dhe Naftëtarit, do t'ju bënim thirrje që të ruanit qetësinë dhe të shmangeni nga çdo incident i mundshëm. Çdo problem i ndodhur, do të jetë në dëm të skuadrës dhe klubit. Ndaj, kërkojmë mbështetje shembullore dhe qytetare", u tha në deklaratën e klubit. Eris Sylyku