Super-Besëlidhja, Tomori bind në derbi
Shiu shtyn Shënkolli-Bylisi, ndërsa Egnatia-Kastrioti luhet vetëm 45 minuta
Besëlidhja shkatërron Besën dhe e nxjerr përfundimisht nga gara për rikthimin në Superiore. Portieri Kaloshi ndëshkon skuadrën e tij ku bën gabime foshnjarake dhe pëson tre gola duke e detyruar trajnerin Bledar Sinella që ta nxjerrë nga loja që në minutën e 59-të. Kavajasit...
Besëlidhja shkatërron Besën dhe e nxjerr përfundimisht nga gara për rikthimin në Superiore. Portieri Kaloshi ndëshkon skuadrën e tij ku bën gabime foshnjarake dhe pëson tre gola duke e detyruar trajnerin Bledar Sinella që ta nxjerrë nga loja që në minutën e 59- të. Kavajasit pësuan humbjen e dytë radhazi, ndërsa kanë gjashtë takime që nuk fitojnë. Besa zbret në vendin e 6-të me 13 pikë dhe duket se shuhen përfundimisht shpresat për elitën. Ndërsa, Besëlidhja bën një paraqitje shumë të mirë dhe siguron tri pikë shumë të rëndësishme në këtë periudhë.
NDESHJA
Loja nis me vendësit në sulm ku fillimisht Shabani e Oshafi shpërdorojnë dy raste shumë të mira. Në të 14-ën është Omar Kamara që finalizon saktë një aksion të miqve dhe i jep avantazhin. Megjithatë, katër minuta më pas është Oshafi që korrigjon shënjestrën dhe barazon rezultatin. Në vazhdim, vendësit krijojnë sërish raste me Shabanin e Oshafin, por mungon finalizimi. Pjesa e dytë nis me sulme të njëpasnjëshme të Besës. Kur pritej goli i avantazhit nga kavajasit, pasi kishte gabuar dy herë Perja me kokë në 47-ën e 49-ën, vjen eurogoli i lezhjanëve me anë të Bangoura në minutën e 54-t. Dy minuta më pas është Frroku që realizon golin e tretë për Besëlidhjen duke përfituar edhe nga një gabim foshnjarak i portierit të Besës, Ariol Kaloshi. Trajnerin Bledar Sinella nuk e mbajnë më nervat dhe vendos ta nxjerrë nga loja gardianin duke hedhur në fushë Pujën. Në minutën e 75-të ka një rast të diskutueshëm ku vendësit pretendojnë për penallti pas prekjes me dorë të një mbrojtësi mik. Anësori Barushi thërret kryesorin duke i bërë të ditur se është 11-metërsh, por gjyqtari Mustafaraj vendos për faull në favor të Besëlidhjes duke mos e ndryshuar vendimin e tij. Kavajasit janë të pafuqishëm dhe e kanë shumë të vështirë të shënojnë, ndërsa Besëlidhja e menaxhon në mënyrën më të mirë avantazhin. Madje, në minutën e 2-të shtesë, lezhjanët shënojnë edhe golin e 4-t me anë të Përgjonit. Një 3-pikësh shumë i rëndësishëm për Besëlidhjen.