E kërcënoi i afërmi i lojtarit, Gjoka: Jam këtu të bëj trajnerin
Trajneri: Duhet të ndryshojmë mentalitetin për të vazhduar me fitore
Një ditë përpara ndeshjes me Kamzën, trajneri i Vllaznisë, Ernest Gjoka, ka marrë një kërcënim përmes telefonit dhe këtë gjë ua bëri me dije drejtuesve të tij. Gjatë stërvitjes, konferencës, por edhe udhëtimit për në shtëpi, trajneri i kuqebluve u shoqërua gjithë kësaj kohe nga forcat e policisë. "Panorama Sport" ka arritur të zbulojë se trajneri i Vllaznisë ka marrë një kërcënim nga njëri prej të afërmve të lojtarëve kuqeblu. Mësohet se gjatë telefonatës, ky i fundit i ka kërkuar trajnerit që të grumbullojë për ndeshjen me Kamzën të afërmin e tij, i cili është lojtar i Vllaznisë. Mirëpo, trajneri ka qenë i prerë në këtë aspekt dhe nuk ka toleruar askënd. Ai ka marrë tashmë vendimin që në skuadrën e Vllaznisë do të jenë vetëm lojtarët që e meritojnë fanellën dhe do të japin maksimumin për skuadrën. Por duket se kjo gjë ka sjellë irritimin e të afërmve të lojtarit, të cilët kërcënuan trajnerin. Në këtë ngjarje u përfshinë edhe forcat e rendit, por Gjoka me këtë rast ka dhënë një sinjal të qartë për skuadrën e tij. "Te Vllaznia jam vetëm për të punuar si trajner. Unë kam ardhur në një qytet mikpritës dhe shumë miqësor. Sa i përket pjesës së kërcënimeve, nuk dua të diskutoj shumë në këtë drejtim. Dua të bëj punën time dhe policia punën e saj. Kërcënimet janë pjesë e këtij zanati", ka thënë Gjoka pas ndeshjes. FITORJA- "Po luftojmë shumë për të ndryshuar mentalitetin, por kjo do kohën e saj. Mos harrojmë që kishim 5 mungesa. Mos harroni që ne dhamë maksimumin tonë për të kaluar Tiranën dhe kjo ndikoi. Por, gjithsesi është shumë e rëndësishme fitorja. Ne dalim para portës, bëjmë dhe golin. Duhet të krijojmë mentalitet pathyeshmërie. Skuadra në momentin që është në fitore, duhet të dijë të menaxhojë rezultatin. PËR INCIDENTIN- "Unë mendoj që kam ardhur këtu si trajner futbolli. Të gjithë e dimë çfarë qytetari ka Shkodra. Nuk ka vlerë të diskutojmë për këtë çështje. Unë do bëj punën time si trajner. Policia do bëjë punën e saj". SUKAJ DHE KRASNIQI"Problemi është të mbarojë faza e parë. Kjo skuadër ka nevojë të rindërtohet ndryshe. Të gjithë si klub më kanë dhënë garanci që do jenë në ndihmë të skuadrës për të sjellë mbrojtës. Duhet të presim dhe të gjejmë momentin e duhur sa të hapet merkato". ECURIA- Kur mësohesh vetëm me fitore, nuk është kollaj të kthehesh të humbja, por do mësohemi, futbolli kështu e ka. Po punojmë shumë. Një skuadër që të jetë e suksesshme, duhet të dijë të sillet në fushë", tha Gjoka për "SuperSport".