Mesi gabon nga 11 metrat, por Barça bën “poker”
Lionel Mesi i pafat, tri shtylla dhe penallti e humbur
Ndërsa Reali i Madridit është ngjitur dy ditë më parë në "çatinë" e botës, Barcelona iu përgjigj dje në distancë "galaktikëve" me 4 gola, por edhe me një Luiz Suarez të rigjetur që realizon një dopietë personale, përveçse me një Mesi në formë stratosferike, i cili ndalet nga shtyllat ( tre të goditura) dhe portieri kundërshtar, nga 11 metrat, në minutën e 70-të. Me pak fjalë, "El Clasico" e 23 dhjetorit parashikohet një spektakël i vërtetë, si gjithmonë...
NDESHJA - Takimi ndaj Deportivos nis me "Pleshtin" që tregon përpara tifozërisë së tij të katërtën "Këpucë të Artë" të karrierës. Trajneri Valverde rikuperon Iniestën (titullar), por lë jashtë për të mos rrezikuar Busketsin, ndonëse pas 22 minutash humb Alkaserin për dëmtim. Gjithsesi, për Barcelonën nuk ndryshon asgjë, sepse katalanasit janë padronë të topit dhe, si gjithmonë, portierët rivalë janë më të impenjuarit. Ruben i Deportivos është fantastik, protagonist i katër ndërhyrjeve fenomenale në pjesë e parë, tri herë ndaj Mesit dhe një ndaj Vidalit. Në golin e avantazhit, minuta e 29-të, Iniesta gjen me një asist milimetrik Mesin, që shërben Suarezin, i cili dërgon lehtësisht në rrjetë. Dyfishimi, i cili mbylli virtualisht llogaritë në minutën 41, me Paulinjon që shtyn në rrjetë, goditjen e Mesit të kthyer mbrapsht nga shtylla, me numrin 10, i cili katër minuta më parë kishte shkundur edhe traversën. Ka hapësirë për polemikë edhe në të 45ën, kur Lahoz i mohon një gol Suarezit, pas një parabole që kalon dukshëm vijën fatale. Gjithsesi, driblimet dehëse dhe vertikalizimet spektakolare të Barçës do të vazhdojnë edhe në pjesën e dytë, kur Suarez do të festojë dopietën personale pas vetëm dy
minutash lojë, ndërkohë Mesi është i pafat, teksa në të 67-ën koleksionon shtyllën e tretë, ndërsa në të 70-ën sheh penalltinë që t'i ndalet nga portieri kundërshtar. Por katalanasit do të bëjnë 4-0 në të 75ën (përpara saj Alba kishte goditur shtyllën e katërt), ndërsa në të 85- ën shtyllat bëhen pesë, këtë herë me një të majtë të Suarezit, ndonëse në fund ka sërish festë për Barcelonën kryesuese.