Laçi thyen Flamurtarin, Duro: Arbitri kamikaz
Luhet në dy ditë prej përmbytjes së fushës, Flamurtari nuk ia del as të barazojë
Laçi i Mezanit u gë zohet tri pikëve të vendosura nga penalltia e shënuar prej Rexhinaldos, që e ngjisin në vendin e katërt, me vetëm një më pak sesa Flamurtari. Ndërkombëtari Xhaja nuk ndalet vetëm me penalltinë e akorduar në pjesën e parë në dëm të Flamurtarit, por në gjysmën e dytë të ndeshjes që u luajt dje u dha shkas vlonjatëve për pretendime të tjera. 45 minutat e dyta, pas përmbytjes së fushës të shtunën, janë luajtur thuajse me një portë, ku Flamurtari ka tentuar me çdo mënyrë që të ndryshojë rezultatin dhe Laçi që ka mbrojtur rezultatin.
PJESA E PARË - Në një terren të rënduar nga shiu që nuk pushoi për asnjë minutë, dy skuadrat u munduan të gjenin golin me të gjitha forcat. Gjithsesi, miqtë e drejtuar nga Mezani në minutën e 11-të do të lëshojnë sinjalin e parë në portën kundërshtare me një gjuajtje të Lushkjes që pritet pa problem nga Nurkoviç. Vlonjatët kundërpërgjigjen me Bicajn, që me kokë, pas një krosimi të Hoxhajt në zonë, detyron portierin Selmani të bëjë mrekullinë. Minutat kalojnë dhe, bashkë me to, gjendja e fushës rëndohet. Fillimisht, në minutën e 23-të, Fangaj del përballë portierit Nurkoviç, pasi ka një hutim të mbrojtjes vendëse, gjuan fort, por "gardiani" grushton duke shmangur një gol të sigurt. Ndërsa në minutën e 35-të, Nika del bukur në krah dhe kroson për Uzunin, i cili në dyluftim me Siljanovskin rrëzohet. Arbitri Xhaja jep 11metërsh, pavarësisht protestave të vendësve. Nga pika e bardhë, një minutë më pas Rexhinaldo nuk gabon, kalon Laçin në avantazh.
PJESA E DYTË - Dje, moti ishte i kthjellët, por me sa u pa, nuk ishte i tillë kryesori dhe trupa e xhaketave të zeza. Flamurtari ishte i qartë në idetë e lojës dhe kërkoi ndryshimin e rezultatit me çdo formë dhe me raste të shumta shënimi. Madje, ka pasur edhe dy momente të pretenduara për penallti të padhëna. Në të 51-ën është Alvesh që kërkon një krosim në qendër të zonës, por Fangaj, në rrëzim e sipër, e pengon atë dhe Xhufon duke iu humbur ekuilibrin. Kryesori Xhaja është i vendosur të vijojë lojën. Në fushë ka protesta nga lojtarët dhe në shkallët e stadiumit, gjyqtari ofendohet në kor. Flamurtari hidhet i gjithi në sulm, ndërkohë që Laçi mbron me fanatizëm. Në të 55-ën është një goditje e
Alvesh me kokë që përplaset në shtyllën e djathtë të Selmanit. Xhufo dhe Alvesh tentojnë, por pa rrezik në portë. Loja luhet thuajse me një portë, por Flamurtari nuk kalon "barrikadën" Selmani. Ka edhe tentativa thuajse të dëshpëruara nga Alvesh e
Sidibe nga distanca. Në fund, në minutat 90 dhe 90+3' ka pasur dy tentativa të rrezikshme nga Flamurtari. Fillimisht Siljanovski dhe më pas me Alvesh e Bushiç që ndalen nga Selmani. Laçi i gëzohet fitores e pikëve, ndërsa Flamurtari vuan… gjykimin.