Lika: Fitore e ekzagjeruar, Partizanin nuk e harroj
Trajneri Hasan Lika ka marrë dje fitoren më të thellë në karrierën e tij, por nga ajo që shprehu para mediave dukej se nuk i kishte shijuar, pasi ai sukses vinte ndaj ekipit që e bëri të njohur si lojtar dhe trajner, Partizani. Gjithsesi, ai vlerësoi arritjen e ekipit të tij, ndonëse rezultatin e quan të ekzagjeruar. "Nuk mund ta quaj fitoren më të bukur të karrierës. Ishte e ekzagjeruar. Sot (dje) i kemi shfrytëzuar në maksimum rastet. E kemi treguar që skuadra ka luajtur mirë, por nuk e kemi gjetur rrugën e rrjetës. Ndaj Partizanit, për fat të mirë shfrytëzuam çdo moment dhe u treguam më racionalë. E dinim që me sulmuesit që kemi mund t'i gjenim shpeshherë të papërgatitur. Mendoj që dy ndeshjet e fundit u shpërblyem. Duhet të jemi të kujdesshëm dhe nuk duhet të kalojmë në eufori. Baze e çdo skuadre për të shkuar te rezultati është loja. Na duhet të jemi të suksesshëm dhe në ndeshjet e tjera. Ne nuk jemi një skuadër që mund të fitojmë 5-0 ndaj Partizanit. Mbrojtja e Partizanit gaboi më tepër seç duhej. Jemi skuadër që krijojmë dhe na ka munguar shënimi i golave. Ishim të përgatitur për të qenë të kujdesshëm. Unë e kam cilësuar që Partizani është skuadër e fortë. Ndoshta futbollistët e Partizanit nuk e kanë vlerësuar siç duhet ndeshjen. Edhe kur kemi humbur apo barazuar, në përgjithësi analistë të ndryshëm e kanë vlerësuar lojën tonë. Unë kam ardhur me dëshirë në Gjirokastër. Unë shikoja një skuadër që mund të ecte drejt suksesit. Kemi disa nga futbollistët me të mirë të kampionatit. Ne mund t'i gëzohemi momentit, por jo renditjes se jemi në pozita të rrezikshme. Po japim shpresa nëpërmjet lojës dhe rezultati po vjen", u shpreh trajneri i Luftëtarit, Hasan Lika.
MËSHIRA- Pyetjes se a çoi ndërmend t'i thoshte skuadrës boll me golat, trajneri Lika u përgjigj kështu për mikrofonin e "SuperSport": "Nuk kemi pse themi mjaft. Unë bëra zëvendësime sepse lojtarët ishin të ndëshkuar me kartonë. Kërkonim të kontrollonim lojën. Nuk mendoj se duhet të tolerojmë. Unë sigurisht sot jam pjesë e Luftëtarit, por kur mbaron, gjithmonë pyes për Partizanin".
FITORJA NDAJ STAROVËS- Dje Lika për herë të parë ka fituar një duel direkt me Starovën, sukses i cili solli edhe dorëheqjen e "Bobit". "Është hera e parë që fitoj me Starovën. Kur kemi qenë bashkë, kemi fituar gjithmonë", përfundoi Hasan Lika