Batha në janar te Skënderbeu, e konfirmon i ati
E mundën në fushë, gjirokastritët ‘selfie’ me Moxhin
Ndeshja e djeshme, e cila ka shënuar një rezultat historik, ka pasur disa momente interesante dhe pikante përpara, gjatë dhe në përfundim të sfidës. Nga prania e Moxhit, te lajmi i dhënë nga babai i Bathës për të ardhmen e mesfushorit, si dhe parashikimi i ish-futbollistit gjirokastrit Raqi Liti.
* Takimi Luftëtari-Partizani ka filluar me lënien bosh dhe mosqarkullimin e automjeteve rreth stadiumit "Gjirokastra", me qëllim mbarëvajtjen sa më të mirë.
* Të parët që kanë zbritur në fushë ishin gjirokastritët, të cilët kanë kryer nxehmjen me stafin teknik në krye.
* Futbollistët e Partizanit, pas një nate në hotel "Turizmi", kanë hyrë në dhomat e zhveshjes të shoqëruar nga stafi teknik. Optimizmi dhe buzëqeshja në fytyrat e tyre duket se ishte e parakohshme.
* Në orën 12:35 mbërritën dy autobusë me tifozë të kuq të ardhur nga Saranda. Përkrahësit e Partizanit u sistemuan në pjesën veriore të stadiumit. Autobusët, të vendosur nga klubi i kuq, rezultuan jofatsjellës për "demat". Rreth 150 ishin tifozët e Partizanit, ku nuk mungonin edhe pankartat e tyre.
* Në tribunën VIP, si asnjëherë tjetër, ndodhej deputeti Bashkim Fino, ish- deputeti Ndre Legisi, presidenti Gaz Demi, si dhe ai i Luftëtarit, Grigor Tavo. I pranishëm ishte edhe drejtori i ri i të kuqve, Olsi Rama, si dhe shumë figura të klubit, si Luçiano Moxhi.
* Në minutën e 4-t, shpërqendrimi i mbrojtjes së Partizanit solli dhe ndërhyrjen nga tribuna të një prej drejtuesve të ekipit mik, si dhe të portierit Hoxha për Kotobellin. "O Koto, mbaj Abazajn!"
* Nga tribuna e VIP, një prej drejtuesve i drejtohet Bathës: "O Batha nxirri përpara!".
* Aleksi, i detyruar të ndjekë ndeshjen nga tribuna, ka një këshillë për Rrapën: "O Rrapa, dil përpara!"
* Pas golit të Bregut nuk vonoi që të dëgjohej nga tribuna thirrja e tifozëve të Luftëtarit: "O Bobi (Starova) merr edhe Moxhin që të fitosh në Gjirokastër!"
* Trajneri Hasan Lika, teksa udhëzonte të tijtë, herë pas here i drejtohej Rrocës: "Rroca, hape lojën në krah!"
* Goli i dytë i Abazajt mahniti të pranishmit dhe një prej sportdashësve gjirokastrit për këtë gol tha: "Nuk mbahet mend në Gjirokastër për më shumë se 30 vjet të jetë shënuar një gol i tillë". * Gjithashtu ishte kryesori i takimit Meta, i cili pas shënimit të golit e përgëzoi Abazajn duke i dhënë dorën për interpretimin e bërë: "Eja një minutë! Urime për golin, ke bërë supergol!", tha kryesori.
* Goli i tretë, i realizuar nga Rroca, bëri që në radhët e tifozëve të Partizanit të pllakosë heshtja. Në këtë moment, tifozët gjirokastrit kanë lëshuar batutat të shumta në adresë të tifozëve të Partizanit, kryesisht ndaj atyre të ardhur nga Saranda: "O Delvina, o Delvina!".
* Në të 43-ën minutë, gjyqtari anësor i takimit lejon një prej futbollistëve të Partizanit të ekzekutojë rivënien anësore shumë metra më para nga vendi i caktuar. Këtu, trajneri Lika iu drejtua anësorit Avdo: "Çfarë bën?! Nuk e sheh?!"
* Në pushimin mes dy pjesëve, tribuna VIP u boshatis me kafen e zakonshme, por, për habinë e të gjithëve, zbret Moxhi.
* Pa filluar pjesa e dytë e takimit, zhgënjimi në radhët e tifozëve të Partizanit kulmoi me largimin e tyre nga shkallët e stadiumit duke e "lënë në baltë" Partizanin.
* Raqi Liti, ish-futbollist i Luftëtarit në vitet '70-'80, duket se e parandjeu fitoren e Luftëtarit, teksa tha për "Panorama Sport": "Do përsëritet dhjetori i 1979-ës, ku Luftëtari fitonte 4-0 ndaj Partizanit në Gjirokastër". Në momentin e shënimit të golit të 5-të, Liti u shpreh: "Nuk e gjeta dot rezultatin e saktë".
* Me fillimin e pjesës së dytë, Kotobelli humbet përqendrimin dhe një prej drejtuesve të Partizanit në tribunën VIP thotë: "E harroi Kotobelli topin fare".
* Goli i katërt i shënuar nga Lamçja solli ilaritetin e radhës nga të pranishmit. "O çuna, mos u bëni më gol se është trup
për Partizanin."
* Goli i pestë i realizuar nga Lamçja do të ndizte edhe njëherë zjarrin e tifozërisë së Luftëtarit, "Kë po shohim në fushë?! Interin apo Barcelonën?!"
* 3 minuta para përfundimit të takimit, një sportdashës gjirokastrit duket se po parandiente golin e gjashtë dhe i drejtohet Metës: "O gjyqtar, bjeri bilbilit!". Në minutën e 87- të, Bregu ekzekuton goditjen e dënimit, por Hoxha nuk lejon thellimin e turpërimit të Partizanit me golin e gjashtë.
* Në fund të takimit, i ati i kapitenit gjirokastrit të Partizanit, Refik Batha, ironizon me batutën: "Kapedanë dhe ushtarë trima. Nuk është as e re, as e papritur pamja që kam para syve." Madje Batha duket se ka bërë "spiunin" e të birit kur pohon se Idrizi mund të jetë pjesë e Skënderbeut që në merkaton e janarit.
* Futbollistët e Partizanit, të
"traumatizuar" nga humbja, i janë drejtuar autobusit para derës kryesore të stadiumit "Gjirokastra" kokë ulur duke pritur trajnerin e tyre të dorëhequr, Sulejman Starova.
* Më shumë se 1000 spektatorë ishin prezent në shkallët e stadiumit gjatë pjesës së parë. Me fillimin e pjesës së dytë, numri i tifozëve u rrit ndjeshëm në 1200-1500 pas hyrjes së lirë në stadium.
* Festë e "çmendur" në dhomat e zhveshjes së Luftëtarit për fitoren e thellë ndaj të kuqve.
* Në fund të ndeshjes, drejtuesit e kuq, mes tyre edhe Moxhi, kanë shkuar në një prej lokaleve të qytetit të Gjirokastrës. Pas përfundimit të ndeshjes, dy nga futbollistët gjirokastritë, Rrapa dhe Zguro, kanë shkuar gjithashtu në të njëjtin lokal dhe kanë përfituar për të bërë foto me ish-drejtorin e Juventusit, aktualisht këshilltar i presidentit Demi te Partizani.