Dëmtime dhe pezullime, por Lushnja do kthesën
Zhvillimet e javës së 15-të të Superiores ishin tërësisht në disfavor të Lushnjës. Skuadra e drejtuar nga Hysen Dedja humbi në shtëpi përballë Skënderbeut. E vetmja shenjë që lanë lushnjarët është që shënuan në shtëpinë e tyre për herë të parë në fazën e dytë. Një gol verdhejeshil që në "Roza Haxhiu" mungonte prej 48 ditësh. Që nga ndeshja me Kukësin, lushnjarët kanë një ngritje në lojë, por situata në tabelë mbetet kritike. Sikur të mos mjaftonte rikthimi te humbja i lushnjarëve, rivalët e tyre, Vllaznia dhe Luftëtari, fituan. Tashmë, verdhejeshilët kanë krijuar një diferencë të konsiderueshme pikësh me skuadrat e pjesës së dytë të tabelës. Një distancë e thellë dhe një kalendar aspak dashamirës, ku verdhejeshilët do të luajnë transfertën me Laçin, ndaj kurbinasve në formë.
DEDJA- Për situatën e krijuar ka folur trajneri Dedja. Ai analizon situatën e vështirë që po kalon skuadra. "Lushnja është një skuadër e mirë, një skuadër me karakter. Kemi nevojë për përforcime. Unë dua të veçoj disa lojtarë për ndeshjen me Skënderbeun. I gjithë grupi luajti. Unë, pavarësisht se nuk e kam atë luks, e kam thënë disa herë për të përgëzuar djemtë. Janë çuna që stërviten mirë, punojnë mirë, kanë karakter. Unë nuk heq dorë nga mendimi që ne do të shpëtojmë", deklaroi trajneri Dedja. Tekniku shkodran i verdhejeshilëve i ka dhënë një ditë pushim skuadrës. Ndaj, pritet që sot verdhejeshilët të zbresin në terrenin stërvitor për të përgatitur ndeshjen me Laçin. Te lushnjarët rikthehen qendërmbrojtësi Marku dhe mesfushori Gava pas skualifikimit njëjavor. Por, për shkak skualifikimi do të mungojë portieri Spaho pas kartonit të kuq të marrë në ndeshjen me Skënderbeun. Te Lushnja infermieria vijon të jetë plot, me pesë futbollistë të dëmtuar. AlbanAlushi