“Dibala të tërbohet, stoli po i bën mirë”

Fiton dhe bind! Masimiliano Alegri merr tri pikët e radhës në kampionat kundër Bolonjës, vendin e dytë në renditje dhe sheh mbrojtjen e tij që të dalë edhe njëherë tjetër pa "plagë" (për të shtatën herë radhazi mes kampionatit dhe Champions-it), ndërsa sulmi godet edhe njëherë tjetër me breshëri. Të gjitha këto e bëjnë të lumtur trajnerin e Juventusit, i cili nuk harron që të komentojë edhe momentin e Paulo Dibalës: "Treguam edhe njëherë tjetër soliditetin e duhur si skuadër duke shënuar tri herë dhe duke mos lënë hapësira pas. Në festë mungoi vetëm Dibala? Në Bolonja zbriti mjaft mirë në fushë. Mendoj se pankina po i bën mirë, po e stimulon. Madje, dua të shoh edhe më nervoz sesa hyri në ndeshje, dua ta shoh që të tërbohet, të nxjerrë jashtë të gjithë atë negativitet që ka brenda dhe më në fund mund të rigjejmë lojtarin që njohim. Unë, por edhe klubi kemi besim të plotë te ai. Dibala është një 'thesar' i Juventusit". Tashmë që kreu në Serinë A është vetëm 1 pikë larg, Alegri mund të jetë më i qetë, ndonëse në Europë e sheh shumë herë më të vështirë sesa në vitet e kaluara: "Këtë vit, Seria A është më e luftuar, por ne nuk do të rreshtim kurrë së kërkuari që të rikthehemi në krye dhe të tentojmë titullin e shtatë radhazi. Por akoma më shumë është Champions-i. Sivjet, skuadrat e nivelit të lartë janë më tepër sesa

në sezonet e kaluara, sidomos anglezet, të cilat janë përmirësuar pa fund. Prandaj, këtu do të jetë një betejë edhe më e ashpër, por në të njëjtën kohë më emocionuese. Sfida e ardhshme me Romën? Në luftën për titull, për Romën flasin pak, por kundrejt një viti më parë ata janë përmirësuar.

Mjafton të shohësh se çfarë kanë mundur të bëjnë në Ligën e Kampioneve për të kuptuar forcën e tyre. Kanë lojtarë fantastikë, por edhe një pankinë të rëndësishme. Pastaj janë një ekip që pësojnë pak dhe mbrojnë në grup. Do të jetë një betejë spektakolare", përfundoi Alegri.