Milan, përsëri “aromë krize”
Djemtë e Gatuzos luajnë vetëm 25 minuta, Verona hakmerret për disfatën në Kupë
Kriza nuk njeh fund. Verona nuk harron humbjen e së mërkurës dhe ia kthen Milanit me të njëjtën monedhë në kampionat. Skuadra e Gatuzos shkërmoqet nga goditjet e prodhimeve të fidanishtes së Interit dhe Juventusit dhe duket e rikthyer ne mediokritetin ku e la Montela.
KËRKOHET FITORE - Gatuzo dukej e kishte parandjerë rrezikun dhe në konferencën për shtyp të së shtunës nuk reshti së foluri për përqendrim dhe respektim ndaj kundërshtarit. Trajnerit të ri kuqezi i duhej një fitore për vazhdimësinë, ndërsa homologut Pekia i nevojitej për t'iu larguar sa më shumë fundit të tabelës. Rino propozon thuajse të njëjtin formacion që ngadhënjeu në mesjavë, ndërsa tekniku i Veronës nuk ndryshoi skemë, por interpretues duke predikuar kujdes dhe sulme të mirëmenduara. Planet e të zotëve të shtëpisë ndryshojnë që në pjesën e parë për shkak të ndryshimeve të detyruara, por idetë nuk modifikohen, fundja ajo sfide duhej fituar.
KOMANDA - Ndeshja e kuqezinjve ngjason me shumicën e atyre të këtij sezoni, me "Djallin" që vendos diktatin dhe rivalët që përfitojnë në mundësinë e parë. Suso e nisi sfidën më mirë nga të gjithë duke pasuar shpesh për Kaliniçin e duke goditur portën, por pa saktësinë e zakonshme. Milani nuk di të konkretizojë superioritetin e krijuar dhe përplaset ndaj portierit Nikolas dhe mbrojtësit Hërto që ndal Suson në shansin më të mirë të takimit. Montolivo dhe Kesi janë dy emra të tjerë që nuk
kanë fat në goditjet e tyre. Për Veronën mjafton një goditje këndi nga i palodhuri Romulo dhe Karaçiolo dërgon në portën sferën në shansin e parë të verdhebluve.
KEAN - Gatuzo e di që koha është e pakët dhe me nisjen e pjesës së dytë dërgon
në fushë Kutronen në vend të Rodrigezit. Energjitë rifreskohen në vijën e parë kuqezi me Andre Silvën që merr vendin e Kaliniçit, por ndërkohë Verona ka përfituar duke dyfishuar rezultatin me Kenin. Ishjuventini transformon në
gol një pasim nga krahu të Besës, i cili më pas do të gjejë edhe golin e tretë që për të ka shije derbi duke qenë se është formuar në akademinë e Interit.
"Djalli" propozon shumë qarkullim topi, por që nuk konkretizohet pavarësisht tentative të panumërta kuqezi (30 goditje drejt portës.)
Pas trefishimit të rezultatit për milanezët bie terri dhe idetë e pakta janë tepër konfuze për t'u marrë fryte. Gatuzo kishte ndezur një shkëndijë me dy fitore, por "dushi i ftohtë" i djeshëm rikthen skuadrën në pikën e nisjes. Për më tepër, kartonët e Susos (i kuq) e Romanjolit (i verdhë, por do të skualifikohet) e bëjnë ndeshjen e radhës ndaj Atalantës të duket një mal i pakapërcyeshëm, teksa Verona në shtëpi konfirmohet një "mace e zezë" për Milanin.