Dinamo ‘thyen’ Burrelin në shtesë
Kryeqytetasit vuajnë për trepikëshin, matjanët dalin duarbosh dhe thellojnë krizën
Dinamo thyen Bur relin në sekondat e fundit. Ka menduar Arvist Gjata që t'u japë këtë trepikësh të artë bluve në fundin e sezonit, në ndeshjen e luajtur në Pezë Helmes. Matjanët rezistuan më së miri dhe synonin që të mos dilnin duarbosh nga kjo transfertë, por mendoi Gjata që t'u ngrinte buzëqeshjen. Tashmë Dinamo e ka të qartë synimin, të qëndrojë në pesëshen e parë të tabelës deri në fund, me qëllim që të tentojë ngjitjen. Me këtë fitore kryeqytetasit shkojnë në kuotën e 17 pikëve, ndërsa matjanët thellojnë më shumë krizën. Fitorja në fundvit do të shpërblehet për blutë, pasi ka qenë vetë administratori Saliaj që u ka premtuar premio, e cila do t'u shpërndahet javën e ardhshme.
PJESA E PARË - Loja nis e qetë dhe me të dyja skuadrat që mundohen të fitojnë terren. Me kalimin e minutave Dinamo intensifikon sulmet, por jo me rrezik. Vendësit dukshëm nënvleftësuan miqtë, gjë që për pak u kushtoi shumë. Në të 10ën është Elmazi që ngacmon me një gjuajtje të fortë, por Hila pret në pozicion. Kundërpërgjigjet në të 17-ën Burreli me Ujkajn, i cili, mbas një pasimi të marrë nga Pashaj, gjuan drejt portës, por spastron zonën Muça. Në të 32-ën Peqini ndërmerr një inkursion nga
e djathta dhe kroson në zonë, por gjuajtja me kokë e Çotës përfundon jashtë. Dinamo bën shumë gabime në mesfushë, gjë që bën nervoz trajnerin Allmuça, i cili hera- herës "shpërthen" nga pankina. E megjithatë, fundi i këtij fraksioni nuk sjell kurrfarë ndryshimi
dhe gjithçka mbyllet sikundër edhe nisi.
PJESA E DYTË - Loja nis me ndryshime në formacion dhe Dinamo fut fillimisht Likën, e megjithatë vetëm pas aktivizimit të Myslimit dhe Tragës, blutë shfaqen superiorë. Të dy mesfushorët me tipare
sulmuese i japin frymëmarrje skuadrës duke marrë përgjegjësi në fushë. Në të 76ën është Traga që pason bukur në zonë për Çotën, por ky i fundit nuk e arrin dot topin dhe humbet një rast të mirë për shënim. Burreli mundohet të dalë përpara me Polisin e Ofejeh,
por pa bërë dot diçka konkrete. Kur gjithçka po shkonte drejt barazimit, mendon Arvist Gjata që të ndëshkojë Burrelin në shtesë. Në të 93ën, një goditje dënimi ekzekutohet nga Traga, topin e zotëron shtatlarti Vanbasten Çema brenda zone, pason
direkt për Gjatën në formë asisti dhe mesfushori nuk gabon, gjuan dhe shënon. Shpërthejnë tifozët dhe lojtarët e Dinamos në festë. Sapo nisi topi nga pika e bardhë rreth 30 sekonda më vonë, arbitri Olsi Sokoli sinjalizon përfundimin e takimit.