Krishtlindje të hidhura, Milani leksion nga Atalanta

Kristante gjen golin e ish-it, "Djalli" i pafuqishëm për reagim

Krishtlindje të tmerrshme për Milanin. Dy trajnerë, dy gola dhe një krizë që po merr përmasa të frikshme. Ajo që shton drithërimat është trajneri që arriti të përkeqësonte një renditje që dukej shumë negative edhe pak javë më parë kur Milani nuk renditej i 11-ti. Gatuzo e nis përsëri me tre sulmues, Borini dhe Kutrone në krah të Kaliniç, por rezultati mbetet i njëjti me Milanin që pëson, nuk arrin të përmbysë dhe provon përsëri shijen e humbjes. Berisha kalon një mbrëmje të qetë me kuqezinjtë që, përveç një agresiviteti jo të vazhdueshëm, nuk tregojnë asgjë të re nga disfatat e fundit.

VËRSHËLLIMA - Kaliniç mund të jetë shembulli për të shpjeguar disi Milanin. Gara e tij nis keq, teksa në pulpën e Toloit stampon gjurmët e takave, më pas përmirëson qasjen në garë dhe nis të shpërndajë pasime të zgjuara. Dy raste në pjesën e dytë me Borinin dhe Kesin vijnë pikërisht si pasojë e asisteve të kroatit. Problem për Montelën ishte finalizimi, situata nuk duket më e mirë nën diktatin e Gatuzos. Sulmuesi i ardhur nga Fiorentina gabon edhe në një rast kur shpërdoron një top të kontrolluar mirë. Publiku nuk e fal dhe, në daljen e tij nga fusha, e "mbyt" me vërshëllima. Një pjesë e "San Siro"-s kapet me familjen Donaruma, duke kontestuar 18-vjeçarin dhe vëllanë e tij në momentin që spikeri lexon emrat e organikës së Milanit.

BRAVO ATALANTA - Duke parë vështirësitë e kuqezinjve, paraqitja dhe fitorja e Atalantës rrezikojnë të dalin në plan të dytë, megjithëse bergamaskët falë tri pikëve të djeshme kapin vendin e gjashtë në klasifikim. Ndryshe nga "Djalli", djemtë e Gasperinit duket sikur dinë saktësisht ç'duhet bërë sa herë që e kanë topin ndër këmbë. Tre pykave të Gatuzos, Atalanta u përgjigjet me po aq mbrojtës qendre, që mbyllin me përpikëri çdo hapësirë dhe nuk lejojnë topa të rrezikshëm në anët e Berishës. Kur duhet, portieri shqiptar bën detyrën duke larguar sferën, ose duke e bllokuar atë për t'u dhënë frymëmarrje shokëve.

PSIKOLOG - Humbje e merituar, për më tepër edhe një gol i anuluar Bonaventurës me të drejtë pasi Kutrone prek topin me dorë. Grumbullimi duket si kura e vetme, për një skuadër që shfaq nevojë të men-

jëhershme për psikolog. Vetëm një rast për gol dhe dhjetë goditje jashtë kuadrati, flasin qartë për momentin psikologjik të Milanit që ka humbur qetësinë. Gatuzo erdhi në momentin më të vështirë, teksa sfida me Interin duket si shans për të treguar efektin e tij.