Kalorësi besnik, Hysaj “diamanti” i trajnerit Sarri
Ka sens shumë të lartë përshtatjeje, i mungon vetëm goli
Ka qenë Elseid Hysaj i përzgjedhuri i revistës napolitane "Il mio Napoli". Mbrojtësit shqiptar i është dedikuar një speciale për aktivizimin e tij me ekipin italian. Në botën e punës, vendi fiks duket si një utopi, aq më tepër në futbollin e sotëm ku ndeshjet janë të shpeshta. Pavarësisht dëshirës së pakët të Mauricio Sarrit për rotacion, përjashtim në kuadër të vendit stabël në formacion bën Elseid Hysaj. Mbrojtësi i lindur në Shkodër, djepi i kulturës shqiptare, e njohur ndryshe si Firence e Ballkanit, është një titullar fiks në skemat e trajnerit të Napolit, me të cilin ka punuar në gjashtë vitet e fundit. Mund të thuash Napoli apo Empoli, emëruesi i përbashkët mbetet Hysaj, që duket se nuk pyet për diskutimet tipike mbi ekonominë e energjive brenda ekipit.
I PALODHUR - Karriera e Hysajt mori hov me ardhjen tek Empoli i të rinjve të Athos Banjolit. Trajnerit i ra në sy një djalosh luftarak i blerë për 50 mijë euro nga Vllaznia. Më 20 tetor të 2012, mbrojtësi debuton në Serinë B dhe që nga ai moment fiton vendimi e titullarit, të cilin nuk e lëshon për 34 takimet e radhës, ku përfshihen edhe katër takime në "play-off". Po 34 ndeshje në sezonin pasardhës kur Empoli luan në Serinë A, pa harruar edhe pesë prezenca në Kupë. Pas kalimit te Napoli, vazhdimësia nuk pritet të jetë e madhe për një të porsaardhur, por Hysaj tregon edhe një herë vlerat si një njeri i palodhshëm dhe punëtor dhe koleksionon 43 ndeshje në sezonin e parë, duke përfshirë këtu edhe disa ndeshje në Europë ku dallohet si një debutues i suksesshëm. Sezonin e kaluar, së bashku me Ligën e Kampioneve, Hysaj konfirmon vesin e vazhdimësisë duke luajtur plot 45 ndeshje me
fanellën axurre të napolitanëve. Për të dhënë një ide të saktë të shifrave të frikshme të mbrojtësit shqiptar, mjafton të themi se në 131 Elseidi ka munguar në vetëm 9 prej tyre, një fakt i jashtëzakonshëm ky, ku pa dyshim Mauricio Sarri ka një meritë specifike duke qenë se e ka përdorur në disa pozicione. Hysaj fillesat i ka në krahun e djathtë, por sensi i tij i përshtatjes ka bërë që të konsiderohet një xholi defensiv, aq sa
në sezonin aktual ka luajtur shpesh në të majtë për të zëvendësuar të dëmtuarin Fauzi Gulam. Hysaj nuk përdoret rastësisht, por trajneri i tij e di se ka ndër duar një diamant 23-vjeçar, që mund të përpunohet ende shumë duke i rritur vlerat në fushë, sidomos në aspektin ofensiv dhe atë realizativ. "Hysaj, deri tani, ka koleksionuar vetëm 4 asiste te Napoli, por ende nuk ka provuar shijen e golit. Për ekspertët e sektorit,
mbrojtësi i kombëtares kuqezi ka ende marzhë të lartë përmirësimi, sidomos pasi cilësohet nga ato lojtarë që nuk kryejnë vetëm detyrën, por sakrifikohen për të dhënë më shumë në çdo aspekt të një ndeshjeje futbollit. Siguria e tij është një garanci për të gjithë repartin dhe kjo është një tjetër vlerë e shtuar. Nëse e krahasojmë me lojën e shahut, Hysaj për Sarrin është një oficer ose kalorës besnik që nuk zhgënjen kurrë dhe që
në vitet e tij te napolitanët i ka munguar vetëm goli, që do të ishte i dytë në karrierën e tij italiane", shkruhet në revistën "Il mio Napoli", e cila i ka dedikuar kopertinën mbrojtësit shqiptar.
Për sa i përket profilit njerëzor, Hysaj përshkruhet si një djalosh me virtyte të larta, që nuk i mohon vetes kënaqësitë e moshës dhe ndonjë tatuazh. Megjithëse vetëm 23 vjeç, Elsi është martuar me Florencën, ish-"Miss Shqipëria" dhe së bashku kanë një djalë, Elisin. Familja e re ka zgjedhur të jetojë në zonën e Lago Patrias, për të qëndruar disi larg rrëmujës së një qyteti shumë të gjallëruar si Napoli dhe për të qenë afër Kastelvolturnos, qyteza stërvitore e djemve të Mauricio Sarrit.
Elsi ka preferuar të ketë pranë vendin e punës. Po po pikërisht punën, atë që kërkoi mes mijëra peripecish i ati, Gëzim muratori, kur zbarkoi në Itali. Fati deshi që të punonte në Empoli, ku Elseidi hodhi hapat e para dhe u zbulua si talent. Për mënyrën si kanë rrjedhur ngjarjes, Elisi i detyrohet shumë vullnet të babait të tij natyror dhe atij futbollistik që nuk mund të jetë askush tjetër përveç Mauricio Sarrit, që jo vetëm i mësoi zanatin, por tani i garanton edhe vendin e sigurt të punës. Nëse Hysaj nuk do ishte punëtor i paepur, vështirë se do të arrinte majat, e aq më tepër vendin fiks, po po, pikërisht atë vend titullari, aq të vështirë për t'u ruajtur në futbollin e sotëm.