Plani i Luftëtarit, katër afrime në janar
Nga porta në sulm, gjirokastritët do të fuqizohen. Nesër ekipi zbret në stërvitje
Luftëtari bën gati katër afrime në merkaton e janarit. Drejtuesit e klubit bluzi kanë punuar në heshtje gjatë këtij muaji dhe është çështje ditësh zyrtarizimi i përforcimeve që do t'u japin garanci gjirokastritëve për një pjesë të dytë të sezonit të suksesshme. Edhe pse në klub janë shumë të rezervuar për të dhënë emra, mësohet se merkatoja është përqendruar më së shumti bren- da vendit. Burime pranë klubit i treguan dje "Panorama Sport" se bisedimet kanë nisur prej kohësh me një portier, një qendërmbrojtës, një mesfushor dhe një sulmues. Pas largimit të Festim Mirakës, Luftëtarit i ka mbetur vetëm Shkëlzen Ruçi dhe i riu Qyrani për portën, kështu që afrimi i një tjetër "gardiani" mbetet synimi kryesor. Nga ana tjetër, për të fuqizuar mbrojtjen, po kërkohet një lojtar që mund të përshtatet mirë në qendër, por edhe nga krahët e këtij reparti. Edhe vetë presidenti Grigor Tavo ka pranuar se duhen përforcime në prapavijë. "Në këtë moment, Luftëtari është duke bërë mirë, por kemi nevojë për një qendërmbrojtës. Duhet të shohim për një futbollist të këtij pozicioni", ka thënë kreu i klubit gjirokastrit për "Supersport", ndërsa la të hapur gjithçka për dyshen e shumëkërkuar Bregu- Abazaj. "Ata janë futbollistë shumë të mirë dhe do mundohemi të bëjmë më të mirën, si për lojtarët, por edhe për klubin", theksoi Tavo. AXHENDA- Vetëm tri ditë pushim për futbollistët e Luftëtarit. Nesër skuadra do të zbresë sërish në fushë, teksa do të stërvitet në Gjirokastër deri më 30 dhjetor. Më pas lojtarët do të pushojnë deri më 3 janar për të rinisur përgatitjet. Klubi ka planifikuar që të kryejë një minifazë jashtë Shqipërisë. Gjasat më të mëdha janë që Luftëtari të frekuentojë sërish Antalian në Turqi, siç bëri janarin e këtij viti. Mirëpo, nuk përjashtohet mundësia të zgjidhet edhe një vend me një klimë të mirë në këtë periudhë në shtetin grek. Këto dy ditë, klubi do të përcaktojë zyrtarisht edhe axhendën pas datës 5 janar. Tomor Shehu