Kamza në alarm, merkato urgjente në mbrojtje

Kamza nuk e ka mbyllur në mënyrën më të mirë këtë vit kalendarik, pasi në tri javët e fundit ka pësuar humbje në Kategorinë Superiore duke rrëshqitur në gjysmën e dytë të klasifikimit. Megjithatë, pikët e grumbulluara në start kanë bërë që ekipi i drejtuar nga trajneri Ndreu të jetë i qetë në përgatitjet dimërore në pritje për t'u rikthyer sërish te rezultatet pozitive me rifillimin e kampionatit. Por, ajo që shqetëson më shumë drejtuesit kamzali në këto momente janë largimet e dy prej futbollistëve që kanë mbajtur peshë në repartin e mbrojtjes. Ivan Fushtar dhe Mërgim Neziri nuk do të rikthehen më në skuadrën e Ndreut, pasi i pari do t'i bashkohet Partizanit që e ka kërkuar me ngulm. Në një situatë të tillë, klubi është futur në merkato për të siguruar futbollistë cilësorë në prapavijë, por alternativat janë të pakta. Trajneri Ndreu, në bashkëpunim me drejtuesit, mësohet se po sheh disa alternativa jashtë vendit, por nuk përjashtohet edhe mundësia e ndonjë afrimi nga Kategoria e Parë, ku ka elementë cilësorë dhe shumë prej klubeve të Superiores po hedhin sytë aty. Për momentin nuk ka asnjë emër konkret në këtë drejtim. Stafi teknik po mendon gjithashtu edhe për fazën përgatitore dhe, sipas të gjitha gjasave, ajo do të zhvillohet në kryeqytet. Kamzalinjtë do të ruajnë grupin e futbollistëve me objektivin e vetëm që të sigurojnë qëndrimin në Kategorinë Superiore edhe në sezonin e ardhshëm futbollistik. Nëse ruajnë ritmin e gjysmës së parë të kampionatit, gjasat që një objektiv i tillë të realizohet janë të mëdha.