Hoxhallari jep garanci, rinovon nëse nuk shitet
Ze Maria “bllokoi” njërin nga krahët, ikën vetëm... Doka
Erion Hoxhallari jep garanci për rinovimin. Në rast se mbrojtësi nuk do të shitet deri në ditët e para të janarit, automatikisht do të zgjasë kontratën. Klubi i ka ofruar zgjatje të marrëveshjes për 2 vite dhe me rritje të ndjeshme të parametrave financiarë dhe në parim ka një lloj konsensusi ( paçka se duhen diskutuar edhe terma të tjerë, që lojtari ia ka parashtruar karshi klubit), firma është shtyrë për ditët e fundit të mbylljes së merkatos. Plani është i qartë, në rast se klubi merr një ofertë të kënaqshme për ta transferuar jashtë vendit, lojtari do të shitet që në janar dhe rrjedhimisht do të shmanget edhe firma. Në rast se nuk vjen, palët do të ulen për të zgjatur kontratën. Vetë presidenti Refik Halili po merret posaçërisht me këtë lojtar dhe prej ditësh është duke negociuar rinovimin. Kujtojmë që 23vjeçarit i skadon kontrata më 30 maj 2018, ndaj drejtuesit po mundohen që ta blindojnë para se t'u ikë nga duart ky "xhevahir", për të cilin kanë investuar në vite. Vetëm një gjë mund të thuhet me siguri të plotë, që brenda vendit nuk do
të ketë kurrfarë lëvizjeje. Të paktën këto janë fjalët që vetë mbrojtësi u ka thënë drejtuesve. Ai ka premtuar se në Shqipëri mbetet vetëm bardheblu, paçka se prioritet ka largimin jashtë vendit. Sakaq, nëse klubi ka pretendime për të mbushur "arkën", Ze Maria mendon vetëm për organikën
Erion Hoxhallari, mbrojtësi me presidentin Halili
dhe sidomos kur tregu vendës ka krizë alternativash. Braziliani, edhe pse mirëkupton faktin që lojtarët duhet të shiten, ua ka bërë të qartë drejtuesve që duhet të "sakrifikojnë" vetëm njërin nga lojtarët e krahëve. Dhe duke qenë se për Albi Dokën ka më shumë oferta së fundmi (për shembull
Osijek në Kroaci dhe Liefering në Austri), ka më shumë shanse që të largohet, për të mos thënë që tashmë e ka mbyllur me bardheblutë. Gjithsesi, ditët e fundit të vitit do të jenë përcaktuese për të dy futbollistët, por edhe për tratativat që mund të zhvillohen për zëvendësuesit e mundshëm të tyre.