Pastore del hapur: Po negocioj me Interin

Argjentinasi: Kemi pasur kontakte përmes menaxherit tim

Italia, Interi dhe Sabati ni. Valter Sabatini, më saktë, personi që e ka zbuluar dhe marrë në Palermo: një mentor dhe një mik. Mendohet të jenë faktorët e duhur për të bindur Havier Pastoren të largohet nga PSG- ja dhe të rikthehet në Serinë A. Për kalimin në Milano të "El Flacos" përflitej prej kohësh, por tani drejtpërdrejt nga Argjentina, ka folur vetë fantazisti: "Zërat mbi Interin? Menaxheri im ka pasur disa kontakte me ta," ka rrëfyer Pastore për të përditshmen argjentinase "Mundo D". "Megjithatë nuk është arritur ende një akord. Është një klub që më pëlqen shumë dhe rikthimi në Itali është ajo që do dëshiroja nëse do largohesha nga Paris Shën Zhërmeni".

SABATINI - Marrëveshje e mundshme, pra. Jo e kryer! E pëlqyer, por ende e gjitha për t'u diskutuar. "Drejtori teknik (Valter Sabatini) është ai që e transferoi në Palermo: është një mik, pra, flasim shpesh së bashku, por momentalisht nuk ka asnjë më shumë. Kam lexuar që u kam thënë lamtumirë shokëve të skuadrës, por nuk është e vërtetë. Gjithmonë kam menduar të jap më të mirën e mundshme për PSGnë. Në ndeshjet e fundit kam luajtur dhe jam i lumtur: janë megjithatë vendimet e trajnerit. Kam ende një vit e gjysmë kontratë këtu. Do jap maksimumin".

NYJA - Mbetet gjithmonë problem i pagës. Bllokimet nga qeveria kineze po detyron drejtuesit interistë të thjeshtojnë në maksimum

kërkesat në merkato dhe fantazisti argjentinas ka një rrogë prej 4 milionësh në sezon. Do bëhet gjithçka për të mbyllur marrëveshjen, por duke konsideruar lajmet nga Kina, për momentin motoja është autofinancimi dhe arritja e Ligës së Kampionëve.