Tirana AS fiton turneun “Krishtlindje 2017-të”
Ditën e Krishtlindjes, pikërisht atëherë kur gjithë futbolli shqiptar ka pushuar për shkak të kësaj feste, në qytetin juglindor ka ndodhur krejt e kundërta. Dje, në orët e mesditës, në qytetin më të madh juglindor të Shqipërisë është zhvilluar për herë të parë trofeu "Krishtlindje 2017" në futboll për femra. Një trofe i pagëzuar me këtë emër kjo edhe për shkak të festave, ndërkohë që jo më kot është përzgjedhur pikërisht Korça, qyteti i festave për t'u zhvilluar ky turne. Katër ekipet e Superligës shqiptare, Skënderbeu, Tirana AS, Pogradeci dhe Bilishti, për më shumë se dy orë kanë shpallur fituesin e parë në historinë e këtij trofeu dhe që ky është vetëm fillimi, pasi çdo Krishtlindje ky aktivitet i pagëzuar do të zbresë me radhë në qytete të ndryshme të Shqipërisë, një turne që është organizuar pikërisht nga dy gazetarët e RTSH-së, Genc Ymeraj dhe Ervin Baku. Pa diskutim, duhen thënë fjalët më të mira për organizatorët, ekipet pjesëmarrëse dhe mbi të gjitha, në prag të festave, Korça është ndezur edhe nga futbolli i femrave. Në fund të aktivitetit miqësor, fituese u shpall Tirana AS, ekip që e ka merituar me plot gojë, por që mbi të gjitha, dje fitoi futbolli i femrave. Në fund, përveç kupës së fituesit, janë shpërndarë edhe katër kupa të tjera. Këtë turne në Korçë e nderuan me pjesëmarrjen e tyre edhe "ikonat" e futbollit të qytetit dhe atij shqiptar. Teodor Vaso, Dhimitraq Xhambazi dhe Veteran Topçiu, jo vetëm që e kanë ndjekur deri në fund këtë turne, por kanë shpërndarë edhe kupat për gjithsecilin. Vërtet një turne për t'u marrë shembull dhe që i bën edhe më të bukura këto festa të këtij fundviti. "Eliminatoret" - Katër ekipet pjesëmarrëse, Skënderbeu, Tirana AS, Pogradeci dhe Skënderbeu, pas ceremonisë së startit, në orën 11:00 të ditës së djeshme kanë zbritur në aneksin e stadiumit "Skënderbeu", atje ku kanë përshëndetur së pari organizatorët. Më pas në bazë edhe të shortit janë zhvilluar dy ndeshjet e para eliminatore, për të mësuar dy skuadrat finaliste. Të dy ndeshjet e para janë luajtur me nga dy pjesë me 15 minuta, ndërkohë që të parat që kanë zbritur në fushë kanë qenë Tirana AS dhe Pogradeci. Një fitore më shumë se e lehtë e vajzave nga kryeqyteti, ndërkohë që pjesa e parë është mbyllur me rezultatin 3-0, teksa qysh në fillim, Begallo dhe Mema kanë vendosur për fitoren. Kodra çon shifrat në 3-0, kaq sa mbyllet edhe pjesa e parë. Në të dytën, Tirana AS kryen edhe ndërrime të shumta, ndërkohë që D. Çela, për Pogradecin, shënon golin e nderit në minutën e 21-të. Serinë e golave e mbyll Leba dhe në këtë mënyrë u mësua edhe finalistja e parë, që ishte Tirana. Ndeshja e dytë ishte ajo mes Skënderbeut dhe Bilishtit, teksa "derbi" i dy ekipeve fqinje nxjerr fitues Skënderbeun e trajnerit Stavrion Lako, që fiton pastër 3-0. Në pjesën e parë shënojnë J. Niçku nga pika e bardhë dhe Qose mbyll 15-të minutëshin 2-0. Në të dytën mjafton edhe një gol tjetër i Qose për të çuar rezultatin në 3-0 dhe në këtë mënyrë është mësuar edhe finalistja e dytë e këtij turneu. Finalja - Pas dy ndeshjeve gjysmëfinale, në fakt është zhvilluar edhe një ndeshje e vogël mes dy ekipeve humbëse në ndeshjet e para. Bilishti me meritë ka mundur Pogradecin 1-0 dhe më pas radhën e kishte finalja e këtij turneu. Skënderbeu dhe Tirana AS kanë zbarkuar në fushë për të mësuar edhe fituesen. U duk se kryeqytetaset e kishin të lehtë, por nuk ndodhi kështu. Të parat që shënojnë, janë miket me anë të Kodrës, por kur pritej vërshëllima e fundit e pjesës së parë, Qose për Skënderbeun shtang të gjithë me golin e shënuar dhe shifrat e pjesës janë në barazimin 1-1. Në pjesën e dytë, Tirana sulmon shumë, por nuk arrin të shënojë për minuta të tëra, teksa edhe rastet janë të shumta. Gjithsesi, për t'u veçuar është se në minutën e fundit të ndeshjes, ka qenë lojtarja që sapo u fut në fushën e lojës, Fuçia, ajo që i jep Tiranës fitoren. Pra, fitorja vjen nga stoli dhe nuk ka më kohë, teksa Skënderbeu mundet nga Tirana AS dhe në këtë mënyrë, kryeqytetaset fitojnë trofeun e parë "Krishtlindje
2017-të". LLAZI SARO SHËNUES: Begallo 3', Mema 6', Kodra 10', Leba 24' / D Çela 21' Tirana AS: A. Popa, Kolgjini, Aliaj (Vishkulli 16'), Beqirhaga (Rexhepi 16'), Leba (Mica 16'), Begallo (Liçollari 16'), Fuçia (Banushi 13'), V. Popa (Muho 13'), Kodra, Mema, Kotarja. Trajner: N. Danxhija POGRADECI: Mançellari, Korça, Jamzallari, Shkullaku (Likollari 26'), Hamolli, Topalli, K. Çela, D. Çela, Samsuri (Fejzo 25'), Kodra, Xhango. Trajner: A. Demaj GJYQTARË: B. Hamzaj, A. Sula (Korçë), K. Gega (Tiranë)