Skënderbeu 200 mijë euro për Abazajn, Takaj në sulm frontal
uftëtari ka primar transferimin e talentit jashtë Shqipërisë
Kristal Abazaj bëhet "fiksim" për Skënderbeun dhe veçanërisht për presidentin Ardjan Takaj. Edhe pse drejtuesit e klubit korçar nuk kanë dalë ende hapur për interesimin që kanë ndaj talentit të Luftëtarit, "Panorama Sport" mëson ekskluzivisht se janë gati të japin 200 mijë euro për blerjen e kartonit. Bisedimet mes Takajt dhe homologut të tij te Luftëtari, Grigor Tavo, janë në fazën fillestare dhe për momentin nuk mund të thuhet nëse klubi gjirokastrit do të pranojë ofertën zyrtare që pritet t'i bëjë Skënderbeu. "Abazajn e duan të gjithë, problemi është që gjërat bëhen serioze kur klubi që e dëshiron, dërgon ofertën zyrtare te Luftëtari. Interesimi është vërtet i madh si për Abazajn dhe Bregun, por ne po studiojmë ofertat jashtë Shqipërisë", treguan dje për gazetën burime zyrtare në klubin gjirokastrit. Talentit të Luftëtarit i përfundon kontrata në verën e vitit 2019, ndërkohë që presidenti Tavo kërkon minimalisht 250 mijë euro për shitjen e kartonit. Vetë Abazaj kërkon të provojë një eksperiencë jashtë Shqipërisë dhe deri më tani, interesim konkret për të ka pasur nga tre klube: ADO Den Hag në Holandë, Sion në Zvicër dhe PAOK në Greqi. TAKIMI - Presidenti i Skënderbeut ka takuar homologun e tij te Luftëtari të premten në mbrëmje, kur dhe u zhvillua ceremonia e fundvitit që organizoi FSHF. Takaj dhe Tavo janë kapur "mat" nga fotografi i "Panorama Sport", Ferdinant Hazizllari, teksa po bisedonin për një transferim të mundshëm të Abazajt. Kreu
i klubit gjirokastrit nuk i ka premtuar asgjë Takajt, por ky i fundit ka testuar situatën duke takuar më pas edhe trajnerin e Luftëtarit, Hasan Lika. Mirëpo, si për koincidencë, pak minuta më pas është shfaqur në ceremoninë e FSHF-së edhe vetë Abazaj, i cili ka pozuar me Tavon për "Panorama Sport". Gjithçka mbetet për t'u parë se çfarë do të ndodh në janar.