Reagon Qarri: Fushtari nuk ikën, do bëjmë afrime në janar
Presidenti i Kamzës mohon shitjen e mbrojtësit
Ivan Fushtar është një prej emrave më të diskutuar gjatë ditëve të fundit në Shqipëri. Mbrojtësi i Kamzës, që ka rezultuar një zbulim gjatë pjesës së parë të kampionatit, konsiderohet si një lojtar i Partizanit në pjesën në vazhdim. Gjatë ditëve të fundit është bërë e ditur se gjithçka është mbyllur dhe se mbrojtësi do të transferohet te të kuqtë në muajin janar. Por, dje ka ardhur reagimi i presidentit të Kamzës, Naim Qarri, i cili mohon zërat dhe konfirmon se futbollisti do të mbetet pjesë e skuadrës edhe në vazhdim.
Reagimi - "Ivan Fushtar është një prej lojtarëve më të rëndësishëm të Kamzës dhe do të vazhdojë të qëndrojë me ne. Ai ka dy vite kontratë dhe nuk do të largohet, pavarësisht atyre që thuhen dhe shkruhen. Mund të konfirmoj se oferta konkrete për të ka, por që ne do ta mbajmë. Kamza do të ruajë grupin e futbollistëve dhe asnjë nuk do të largohet. Madje, do të afrojmë disa lojtarë gjatë merkatos së janarit. Do të shihni që ekipi do ta kalojë këtë moment të vështirë dhe me rifillimin e kampionatit, do të vijnë edhe rezultatet pozitive", shprehet fillimisht Qarri në reagimin e tij për gazetën. Më tej, kreu i klubit zbulon edhe planet në lidhje me fazën përgatitore që do të zhvillojë skuadra jashtë Shqipërisë. "Dy janë opsionet për fazën përgatitore të janarit. Do të shkojmë në Austri ose Antalja. Nesër(sot) do ta vendosim përfundimisht dhe nisja do të bëhet në datën 8 janar. Gjatë fazës do të luajmë edhe disa miqësore. Ju garantoj se Kamza e pjesës së dytë të kampionatit do të jetë edhe më e fortë se kjo e deritanishmja. Do të ruhet grupi dhe do të bëjmë afrime cilësore. Projekti është serioz dhe do të vazhdojë gjatë. Prisni, nuk keni parë asgjë akoma", e mbyll reagimin e tij për gazetën, presidenti i Kamzës, Naim Qarri. Besar Bozgo