Teuta gjen problemin, është... menaxhimi i rezultatit

6 humbje janë pësuar kur kanë qenë në avantazh

Shumë spekulime ka pasur gjatë ditëve të fundit te Teuta sa i përket të ardhmes së stafit teknik pas një gjysmësezoni të dobët, por deri më tani, situata duket e qetë. Merkato është kryefjalë në këtë moment te drejtuesit e bregdetarëve, ku pritet të ketë afrime në të gjitha repartet pas dy fazash relativisht të dobëta. Duke u bazuar tek ajo që ekipi ka dhënë në 16 ndeshjet e para, fillimisht skuadra ka nevojë për një lider në repartin e mbrojtjes. Hrkaç, pavarësisht klasit të tij, nuk ka arritur të kthehet në një lider, ndërsa Shkalla, Hakaj dhe Beqja kanë nevojë të përmirësohen më tepër, në mënyrë që skuadra të mos pësojë kaq shumë. Gjithashtu edhe porta është një shqetësim, 27 gola të pësuar në 16 ndeshje janë tmerrësisht shumë, sidomos për një skuadër si Teuta, që minimalisht kërkon mesin e tabelës. Sulmi është reparti i vetëm që e kalon klasën, edhe pse Teuta nuk ka pasur një lojtar goli, te bregdetarët kanë shënuar pothuajse pjesa më e madhe e lojtarëve që janë aktivizuar si titullarë. Në këtë aspekt, Gugash Magani ka bërë një punë shumë të mirë, me skemat e tij, lojtarët kanë mbërritur te goli 18 herë. Problemi i vetëm i Teutës në këtë edicion dhe që akoma vazhdon të shqetësojë drejtuesit dhe stafin teknik është menaxhimi i rezultatit. Nga 9 humbje në total, që skuadra ka regjistruar deri më tani, në 6 prej tyre ka qenë në avantazh. Gjithashtu edhe në 3 sfida që janë mbyllur në barazim, në dy prej tyre "djemtë e detit" kanë shënuar të parët. Nëse do të ishin treguar pak më të kujdesshëm në këto takime, tani do të kishin të paktën 4-5 pikë më shumë në klasifikim dhe gjërat do të ishin ndryshe. Drilon Xhepollari