Luftëtari, në sulm për Zisin dhe Liçkollarin

Nuk i morën dot në skuadër një vit më parë, bluzinjtë nisin ofensivën në Ballsh e Pogradec

Drejtuesit e Luftëtarit kanë nisur të mendojnë për merkaton dhe i kanë hedhur sytë nga Kategoria e Parë. Sulmuesi i Bylisit, Niko Zisi, dhe mesfushori i krahut të Pogradecit, Jugers Liçkollari, janë në planet e drejtuesve dhe kanë nisur kontaktet që të afrohen te bluzinjtë. Mësohet se të dy futbollistët kanë qenë shumë pranë akordit me klubin gjirokastrit në merkaton e sezonit të shkuar, por në fund marrëveshja është prishur, duke qenë se në pozicionet e tyre aktivizohen Bregu dhe Abazaj, dy futbollistë që janë të pazëvendësueshëm në formacion, duke parë dhe formën e mirë që kanë treguar. Por, tani që interesi për këta të fundit është rritur dhe largimi i tyre është pothuajse i pashmangshëm, pas ofertave të majme financiare drejtuesit janë duke menduar për zëvendësimin e tyre. Bisedimet me futbollistin e Bylisit janë pak të vështira, duke qenë për Zisin janë interesuar edhe klube të tjera të Superiores. Megjithatë, bluzinjtë do të këmbëngulin dhe shpresojnë që t'i realizojnë të dyja transferimet. Deklarata - Pavarësisht rezultateve të dy javëve të fundit ndaj Partizanit dhe Kukësit në transfertë, trajneri Hasan Lika ka kërkuar që ta mbajë skuadrën e tij jashtë euforisë dhe thekson se skuadra ka nevojë për përforcime. "Kemi nevojë për përforcime në çdo repart. Me organikë më të kompletuar do të jemi më të fortë në gjysmën e sezonit të mbetur", tha Lika mes të tjerave pas ndeshjes me Kukësin. Sakaq, në kampin bluzi thashethemet e merkatos sa u takon largi- meve të Bregut dhe Abazajt, mbeten enigmë për aq kohë sa periudha e transferimeve nuk ka nisur zyrtarisht. Me objektivin e vetëm mbijetesën, presidenti gjirokastrit Grigor Tavo është gati që të bëjë edhe sakrifica financiare për të afruar futbollistët e nevojshëm në skuadër. Ndërkohë që trajneri Lika ka shprehur edhe dëshirat e tij për futbollistët që do në ekip. Tomor Shehu