Java e goleadave, si u zhytën klubet në krizë
"Babagjyshi" shpërndau dhuratat e fundvitit edhe në Kategorinë e Parë. Surprizat mënjanë dhe ndeshje të parashikueshme. Kastrioti në Grupin A dhe Tirana në Grupin B vazhdojnë të kryesojnë bindshëm dhe duket se janë në rrugën e duhur drejt ngjitjes në Superiore. Krutanët e bëjnë menjëherë kthesën pas humbjes që pësuan dy javë më parë me Egnatian. Të shtunën fitojnë në fushën e tyre përballë Vllaznisë B me rezultatin minimal 1-0. Një gol i shkodranit Denis Dyca mjafton për t'i siguruar 3-pikëshin skuadrës. Ndërsa, problemi që shqetëson ekipin e këtij sezoni është shpërdorimi i rasteve të shumta përpara portës. Lojtarët e Kastriotit krijojnë raste të shumta, por u mungon finalizimi. Pritet që në merkaton e dimrit të ketë ndërhyrje dhe të fuqizohet sulmi. Egnatia, që u rikthye në Kategorinë e Parë pas dhjetë vitesh mungesë dhe që kishte synime minimale, deri tani është rivali më i denjë për Kastriotin. Jo vetëm që është e vetmja skuadër që i ka mundur krutanët, por rrogozhinasit janë ndjekësit më të afërt me pesë pikë më pak se Kastrioti. Fundjavën e kaluar, Egnatia fitoi në një transfertë të vështirë në Peshkopi ndaj Korabit vendës. Një gol nga Mile dhe një nga Nako i dhanë 3pikëshin Egnatias. Ndërsa, dibranët janë në rënie të lirë. Pasi shijuan për vetëm një vit Superioren, tashmë ekipi rrezikon seriozisht rënien në Kategorinë e Dytë. Klubi ka probleme financiare në një kohë që edhe trajneri Julian Ahmataj u largua përpara disa ditësh. Situata është kritike. Besëlidhja ka humbur shumë nga ekipi që është shfaqur në sezonet e kaluara. Lezhjanët nuk janë të qëndrueshëm për sa u përket rezultateve. Fundjavën e kaluar, Besëlidhja u mund në fushën e vet nga Erzeni. Një sfidë ku vendësit shpërdoruan shumë, ndërsa shijakasit iu falën vetëm golit të Pashës. Besa është dështimi më spektakolar i pjesës së parë të sezonit. Me synime të mëdha dhe një merkato të fuqishme duke afruar futbollistë të rëndësishëm, kavajasit hodhën gjithçka në erë brenda katër muajsh. Ekipi pësoi të shtunën në Pukë humbjen e shtatë radhazi dhe jo vetëm që i dha lamtumirën luftës për elitën, por do t'i duhet të djersijë shumë për të arritur mbijetesën. Dinamo ngjitet në vendin e 5-të pas fitores në limit që arriti në sfidën me Dinamon. Një 3-pikësh që erdhi vetëm në sekondat e fundit pas golit të Gjatës. Në Grupin A, Tirana vazhdon të mos ndalet, madje nuk tregon as mëshirë për kundërshtarët. Bardheblutë tregojnë nga java në javë se kanë diferenca të mëdha me skuadrat e tjera në këtë kategori. Në sfidën e së premtes, kryeqytetasit fituan 4-0 në transfertën e Kuçovës. Një sfidë që e kthyen në "miqësore" duke mos e diskutuar për asnjë moment 3-pikëshin. Edhe Bylisi, që është ndjekësi më i afërt i bardhebluve, fiton po me rezultatin 4-0 ndaj Turbinës. Një ndeshje pa histori që ballshiotët e mbyllin për 20 minuta. Pogradeci fiton një duel të rëndësishëm me rivalin direkt për vendin e 3-të. Liqenorët përmbysin fierakët me rezultatin 3-1 në një ndeshje që prodhon spektakël dhe shumë emocion. Tomori nis të rimëkëmbet. Pas ndryshimit të trajnerëve, Gersi Arbri ka siguruar të shtunën e kaluar fitoren e dytë radhazi, për më tepër në një transfertë të vështirë si ajo e Peqinit. Çudia ndodh në FushëKrujë ku Shënkolli fiton 2-1 ndaj Ilirisë, por në fund është trajneri Ritvan Kulli ai që deklaron dorëheqjen nga pankina duke deklaruar se e ndërmerrte këtë vendim për arsye personale. Besar Bozgo