Elbasani nis merkaton, piketon Toçin
Verdheblutë kërkojnë rikthimin e mesfushorit, priten afrime të tjera
Elbasani e kërkon me çdo kusht ngjitjen në Kategorinë e Parë dhe do bëjë të pamundurën për ta realizuar këtë objektiv. Deri më tani ka bërë gjysmën e punës, por gjysma më e vështirë vjen pas pushimeve. Si një klub me eksperiencë, verdheblutë e dinë shumë mirë këtë gjë, ndaj kanë hyrë në merkato, ku po piketojnë lojtarët që mund të afrohen. Kështu, mësohet se drejtuesit kanë nisur punën për përforcimin e skuadrës, teksa kanë filluar të dalin në skenë edhe emrat e parë të merkatos. Burime të besueshme të "Panorama Sport" pohojnë se Mateos Toçi është drejt rikthimit te verdheblutë. Mesfushori që këtë sezon la elbasanasit për t'iu bashkuar Dinamos, mësohet se e ka lënë në mes aventurën me blutë e kryeqytetit dhe është një lojtar i lirë. Për këtë arsye, elbasanasit kërkojnë të përfitojnë nga situata dhe shumë shpejt mund të nisin bisedimet për të gjetur një marrëveshje midis palëve. 24-vjeçari është një pikë shumë e fortë në mesin e fushës dhe një lojtar i afirmuar tanimë në futbollin shqiptar, ndaj për Elbasanin e Kategorisë së Dytë do të ishte një përforcim që mund t'i bënte vërtet punë. Nga ana tjetër, duke parë se financat në klub janë rregulluar, edhe për mesfushorin do të ishte më i lehtë rikthimi në Elbasan dhe të kontribuonte në ringrintjen e ekipit në Kategorinë e Parë. Gazeta mëson se klubi nuk synon vetëm Mateos Toçin, por edhe të tjera përforcime në merkato. Ndërhyrja imediate kërkohet në repartin e avancuar në majën e sulmit, por për momentin duket e vështirë gjetja e një "pyke", për shkak të mungesës së futbollistëve elbasanas në treg. Vladimir Mema