Ueah: Venger si një baba, prej tij u bëra yll
Zhorzh Ueah e ka përshkruar trajnerin e Arsenalit, Arsen Venger, si një figurë atërore, falë ndihmës së të cilit ai mundi të shndërrohej në një prej futbollistëve më të suksesshëm në Europë. Francezi e ka pasur liberianin futbollist te Monako, ku ai kaloi katër vite të suksesshme përpara se të transferohej te PSG- ja dhe më pas te Milani. Ueah, i cili ka shpallur kandidaturën për president të vendit, mbetet i vetmi futbollist afrikan që ka fituar "Topin e Artë". Por gjatë një interviste për "The Guardian", ai thotë se ai nuk do të kishte arritur kurrë një karrierë të tillë pa mbështetjen dhe këshillat e Arsen Vengerit. "Ai ishte një figurë atërore për mua dhe më konsideronte si birin e tij", thotë 51- vjeçari. "Ky është një njeri, i cili në kohën kur racizmi ishte në kulmin e tij, më tregoi dashuri. Ai më donte në fushë çdo ditë. Një ditë isha shumë i lodhur me stërvitjen dhe i thash se kisha dhimbje koke. Përgjigja e tij ishte: ' Zhorzh, unë e di që është e vështirë, por duhet të punosh fort. Unë besoj se me talentin që ke, ti mund të bëhesh një prej futbollistëve më të mirë në botë'. Kështu që unë e dëgjova dhe vazhdova. Përveç Zotit, mendoj se pa Vengerin nuk do kisha asnjë shans që të isha i suksesshëm në Europë". Në lidhje me garën e tij për president të vendit, Ueah tha se frymëzimi i tij kishte qenë Nelson Mandela: "Kur e takova shumë vite më parë më, tha se nëse do të thërritesha për t'i shërbyer vendit tim, atëherë unë duhet të shkoja. Dhe unë këtë po bëj sot, po zbatoj porosinë e tij".