"Makinë golash", te Tirana shënojnë 14 lojtarë
Kavajasit me të rinj, klubi "hodhi në erë" gjithë sezonin
Ndoshta edhe tifozi më skeptik nuk do ta mendonte se Besa e këtij sezoni do të renditej kaq poshtë në fund të 2017-ës. Pas gjashtë humbjeve rresht erdhi edhe ajo e fundit në Pukë me rezultatin 1-0. Si asnjëherë më parë, verdhezinjtë pësuan plot 7 humbje në një garë ku hynë si pretendentë. Më tepër se kaq, Egnatia madje e diskretitoi Besën brenda në Kavajë duke e shkatërruar 1-5. Humbja e fundit në Pukë i vuri vulën një gjysmëkampionati të zi për Besën në të gjitha drejtimet. Mjafton t'i referohemi formacionit në ndeshjen në Pukë për të kuptuar në çfarë derexheje është katandisur ekipi. Në formacionin bazë bënin pjesë futbollistë të U-17 dhe në stol po ata. Të kërkosh të fitosh në Pukë me 17-vjeçarë që kurrë nuk kanë parë borë me sy, është një "ëndërr". Përtej dëshirës së këtyre të rinjve, Kategoria e Parë nuk është kampionat për adoleshentët. KRIZA
Gjatë verës u rikthye në klub ish-presidenti Nexhat Bizhdili. Me ndryshimin e kryebashkiakëve, Bizhdili u afrua sërish te Besa. Dhe menjëherë nisi puna për ndërtimin e një skuadre që shpalli si objektiv ngjitjen në Superiore. Në ekip u afruan lojtarë me eksperiencë si Ervis Kaja, Mario Morina, Emrush Kaloshi, Erand Hoxha, Meglid Mihani apo Mirel Duka. Por, gjithçka nisi të prishej javë pas jave duke mbërritur në situatën, ku Besa ka dalë nga gara për Superioren. Madje, duket se do të luftojë për t'i shpëtuar rënies. Lojtarët e afruar janë larguar tashmë, pasi klubi nuk mund të vazhdonte të paguante shuma të konsiderueshme në një kohë që nuk ka më synime. Si në asnjë kampionat më parë, Besa në 12 javë pëson plot 7 humbje dhe për më tepër vetëm në dy sfida në Kavajë, ndaj Egnatias e Besëlidhjes pëson jo pak, por plot 9 gola. Më keq nuk ka ku të shkojë. Nga shtatori deri në dhjetor verdhezinjtë kanë bërë paraqitjet më të dobëta gjatë të gjithë historisë 94-vjeçare të futbollit kavajas. Sa për kujtesë, pavarësisht këtij turpi, Bashkia e Kavajës së bashku me presidentin Nexhat Bizhdili ka vijuar t'u japë çdo muaj rrogën stafit dhe futbollistëve. Ndërkaq, pritet që në janar të ketë shumë ndryshime dhe të afrohen në ekip futbollistë të rinj, të cilët do të zëvendësojnë titullarët e larguar. Tashmë, kavajasve do u duhet të presin minimalisht edhe një sezon e gjysmë për të shpresuar te rikthimi në Superiore.