Ikën Magani, Nica merr Teutën pas 12 vitesh
.lubi i beson trajnerit që u dha trofeun e fundit durrsakëve
Ka marrë fund aventura e Gugash Maganit në drejtimin e Teutës. Drejtimin e skuadrës për pjesën e dytë të sezonit do ta marrë Stavri Nica, i cili ndihmës të tij do të ketë Ilir Biturkun, që aktualisht drejton ekipin U-17 të Teutës. Lajmi është bërë i ditur mbrëmë nga faqja e klubit dhe trajneri i ri do të prezantohet më 4 janar, kur skuadra do të fillojë me përgatitjet për pjesën e mbetur të kampionatit. Dyshja Nica-Biturku nuk është e panjohur për kampin durrsak, pasi të dy e kanë drejtuar Teutën në të shkuarën. Madje trofeun e fundit Teuta e ka fituar pikërisht me Nicën në stol (Kupën e Shqipërisë në vitin 2005). Ndërkohë, ekipi u është rikthyer dje përgatitjeve në terren pas disa ditësh pushim me rastin e festës së Krishtlindjes. Të martën "djemtë e detit" zbritën në fushë për herë të parë që nga humbja me Skënderbeun, e cila ka lënë shumë pasoja. Edhe pse mungon zyrtarizimi nga ana e klubit, Gugash Magani nuk do të jetë më trajneri i bregdetarëve. Mësohet se peqinasi u ka thënë lojtarëve se, pas humbjes me Skënderbeun në Korçë, do të largohej nga skuadra. "Huna, kjo ishte ndeshja ime e fundit nën drejtimin e Teutës! Ju uroj sukses në vazhdim", mësohet t'u ketë thënë Magani futbollistëve durrsakë. Ndërkohë, në seancën e djeshme stërvitore, ekipi u stërvit nga shefi i klubit, Eduard Salillari, i cili do të qëndrojnë në krye të skuadrës deri më 30 dhjetor, kur do të mbyllen edhe përgatitjet për këtë vit. Gjatë kësaj periudhe, drejtuesit do të punojnë për të gjetur zëvendësuesin e Maganit.
LARGIMET
Nga bregdetarët nuk do të ketë vetëm afrime, por dhe largime. Përveç Albi Dostit dhe Sunday Abe, që janë larguar zyrtarisht, gazeta mëson se, me shumë mundësi, edhe tre lojtarë të tjerë do të prishin marrëveshjet me klubin. I pari është portieri Shpëtim Moçka, ndërsa edhe vlonjati tjetër, Ardit Shehaj, sipas të gjitha gjasave, nuk do të jetë më pjesë e Teutës. Njëkohësisht sulmuesi i ardhur nga Braga, Onyeka Lucky Osemene, pritet të ndërpresë bashkëpunimin me drejtuesit e klubit. Ai është lojtari më i paguar në skuadër, por nuk e ka justifikuar aspak besimin e drejtuesve, duke mos shënuar asnjë gol këtë kampionat. Pa bërë më parë afrimet, pritet që klubi të mbajë pezull largimet, për t'i zyrtarizuar më pas në momentin e duhur. Drilon 2hepollari