Modesti Shezni: Gaboi Shiku, nuk e prita unë
"Jemi rikthyer, pasi ndryshuam taktikë dhe mentalitet"
Tri ndeshje njëra pas tjetrës si titullar në kampionat dhe porta e Juventusit është e blinduar prej tetë sfidash radhazi. Vojceh Shezni ishte protagonisti i madh i finales së përballjes kundër ishRomës së tij, kur ndali Patrik Shikun në minutat shtesë dhe shoi ëndrrat e verdhekuqve për të shënuar në limite golin e barazimit. "Besoj se, më shumë sesa shpëtova rezultatin, gaboi Shik. Ai më goditi në trup... Pashë që Benatia u ngatërrua në momentin e kthimit prapa të topit dhe u përpoqa të bllokoj kuadratit: ajo pritje vlejti dy pikë më shumë dhe dy ditë pushimi".
KTHESA - Shezni ka modesti me tepri: "Me mbrojtësit që kam përpara meje, gjithçka është më e thjeshtë: kundërshtarët kryejnë 2-3 goditje për ndeshje, nuk është e vështirë të luash kështu". Te bardhezinjtë, pas humbjes 2- 3 kundër Sampdorias, erdhi kthesa: "Qarkullon një frymë pozitive, kthesa u krye si në aspektin taktik, po ashtu edhe psikologjik. Në fillim fitonim edhe 6- 2, por titujt kështu nuk fitohen, në veçanti Liga e Kampionëve. Trofetë vijnë duke mos pësuar, me 1-0 apo 2-0, si tani".
TITULLI? KATËR PRETENDENTË - Fitorja me Romën e çoi në gjashtë pikë avantazhin e bardhezinjve nga skuadra e Euzebio Di Françeskos dhe, rrjedhimisht, shkëputi Napolin e Juven nga ndjekësit. Por, portieri nuk është plotësisht i bindur: "Edhe Roma e Interi po zhvillojnë një kampionat madhështor. Roma ndodhet 6 pikë prapa, por ka një ndeshje më pak dhe duhet akoma të luajmë në 'Olimpico'. Mendoj që si ata, po ashtu edhe zikaltrit, mund të luftojnë për titullin". Dhe mos i kërkoni të zgjedhë mes kampionatit dhe Ligës së Kampionëve, pasi trofe ende nuk ka ngritur asnjë: "Këtu jemi te Juventusi dhe duhet të fitojmë në çdo kompeticion ku marrim pjesë. Pra, objektivi është të shkojmë deri në fund, më pas të shohim se çfarë do ndodhë".
BUFON, NJERI I MADH - Për këtë sezon, megjithatë, do i duhet të bëjë ende
"stafetën" me Xhixhi Bufonin: "Ai është një njeri i madh dhe një kampion, më ndihmon kur nuk luan dhe unë bëj të njëjtën gjë kur i takon atij. Eksperienca e tij është e rëndësishme për mua, e kam konsideruar gjithmonë portierin më të fortë në botë. Tani shoh edhe një person human, por nuk ishte një surprizë". E, kushedi, nëse tek Arsenali
po "kafshojnë duart" që e lanë të lirë në verë. "Kalimi te Juvja ishte zgjedhja e duhur për karrierën time dhe, në çdo rast, Arsenali ka një portier të madh si Çeh. Të gjithë jemi të lumtur". Mbi të gjithë, Juventusi: "E imagjinoj veten gjatë në këtë klub, në jetë më pëlqen stabiliteti, nuk jam tipi që dëshiron të ndryshojë skuadër çdo 2-3 vite".