Besëlidhja, rikthehet dashuria për serbët
Drejtuesit lezhjanë kërkojnë shërbimet e mesfushorit Milan Gjorgjeviç
Besëlidhja tashmë është lënë pushim dhe do të grumbullohet pas festive të fundvitit për të nisur minifazën dimërore. Merkatoja e janarit te Besëlidhja ka nisur që më 1 dhjetor kur skuadrës në stërvitje i është bashkuar sulmuesi serb Kosta Bajic, i cili do të zyrtarizohet shumë shpejt. Drejtuesit e skuadrës janë në bisedime për të rikthyer edhe mesfushorin e majtë, serbin Milan Gjorgjevic, që është i njohur në Lezhë, pasi ka luajtur që nga janari i 2012-ës e deri në fund të sezonit 2015- 2016. Momentalisht, Milan Gjorgjevic luan me skuadrën OFK të Beogradit dhe i duhet leja nga ky klub për t'u rikthyer te Besëlidhja. "Fanella e skuadrës lezhjane për mua është shumë e dashur, pasi aty kam luajtur në moshën më të mirë, pra, kam pasur kulmin tim në fushën e futbollit. Përveç klubit, mua më pëlqen edhe qyteti dhe njerëzit, pasi aty kam banuar edhe me familjen time, bashkëshorten dhe vajzën. Ndaj për atë qytet kam shumë mall për arsyen e thjeshtë se aty kam kaluar shumë mirë. Fazën e parë të këtij sezoni e mbylla tek OFK e Beogradit, një skuadër shumë e njohur e futbollit serb. Kam një ofertë nga Besëlidhja, por ende jam në mes të OFK-së dhe Besëlidhjes, këtë do ta ndaj pas festave. Të dyja këto skuadra kanë të njëjtin objektiv dhe po të thuash edhe histori. Duke përfituar nga kjo intervistë, dua që futbollistëve, drejtuesve teknikë, presidentit, po ashtu edhe gjithë tifozërisë lezhjane, t'iu uroj gëzuar festat e fundvitit!", përfundoi prononcimin e tij për gazetën "Panorama Sport" serbi Milan Gjorgjeviç. Preng Gjikola