“Djalli” kërkon një sulmues, do të sakrifikohet Çalhanoglu
Ka qenë një fazë e parë e sezonit shumë zhgënjyese për mesfushorin turk të Milanit, Hakan Çalhanoglu. Për turkun kishte pritshmëri të mëdha kur u transferua në verë te kuqezinjtë, por deri tani ka dhënë shumë pak nga çfarë pritej. Siç raporton gazeta gjermane "Sport Bild", 23-vjeçari mund të largohet në janar për të rigjetur formën e dikurshme. Për lojtarin interesohen dy ekipet e mëdha turke, Fenerbahçe dhe Gallatasaraji, të cilat e dëshirojnë atë në formë huazimi. Megjithatë, Milani nuk është shumë i interesuar për të huazuar mesfushorin, por ndoshta për kuqezinjtë, duke parë edhe problemet financiare, shitja do të ishte alternativa ideale. Madje, duke qëndruar edhe te lajmet e fundit që vijnë nga selia e "Djallit", drejtori sportiv, Masimiliano Mirabeli, po mendon që ta nxjerrë në shitje Çalhanoglunë, për të financuar një blerje në sulm. Milani, duke parë që Kaliniç dhe Silva nuk po japin atë që pritej, njerëzit e merkatos kuqezi kanë vënë në shënjestër tri alternativa. I pari është Pako Alkaser, "goma rezervë" e sulmit të Barcelonës, i cili vazhdon të grumbullojë minutazh të paktë, pavarësisht largimit të Nejmarit. Emri i dytë është ai i Olivie Zhiru, gjithashtu i bllokuar tek Arsenali, falë konkurrencës me Lakazet dhe Sançez. Ndërsa i treti, por jo më pak i rëndësishmi, është Manolo Gabadini. Sulmuesi italian aktualisht luan në Premier Ligë, me Sauthemptonin, por pa dyshim që dëshira e tij është një rikthim në Serinë A, ku ka një "bast" personal për të fituar.