"Ronaldon e adhuroja, por tani e mund"
Adhurimit për Kristiano Ronaldon i ka ardhur fundi. Kilian Mbape tani ka nisur rrugëtimin për t'u bërë më i miri në botë dhe thotë se dëshiron ta mposhtë në "Bernabeu". Në një intervistë për "Marca"-n, ai tregon objektivat e tij për të ardhmen. REAL-PSG- "Është si një finale. Do të luajnë dy ekipet më të mira në botë. Mirë, Reali është ekipi më i mirë në botë, ndërsa ne po rritemi". "BERNABEU"- "Kam luajtur në stadiume të mëdhenj, por kurrë në ' Bernabeu'. Është hera e parë dhe kam dëshirë ta fitoj këtë ndeshje. Duhet ta respektojmë Realin, por kur të zbresim në fushë nuk ka vend për të tilla gjëra. Duhet thjesht të bëjmë maksimumin për t'i dhënë një mesazh botës së futbollit". REALI- "Më pëlqen në gjithçka. Është klub i kompletuar dhe ka lojtarë të mëdhenj, të cilët luajnë bashkë prej disa vitesh".
RONALDO- "Është idhulli i fëmijërisë time. Ishte bukur ta takoja, por tani unë jam vetë lojtar dhe dua të fitoj. Pak më intereson fakti që e kam pasur idhull. E adhuroja kur isha i vogël, por jo tani. Është e vërtetë që mësova shumë gjëra prej tij, ndërsa tani po luaj me Nejmarin. Edhe ai është në të njëjtin nivel si Kristiano".
MCN- "Nuk mendojmë aspak për këtë gjë. Ne nuk duam të jemi sulmi më i mirë në botë, por thjesht ekipi më i mirë në botë".
PSG- "Zgjodha PSG-në sepse është ekipi i qytetit tim. Është njëlloj si një fëmijë madrilen të luajë për Realin. Unë doja të luaja për PSG-në dhe jam shumë i lumtur që ndodhi". REALI- "Jam i ri dhe në të ardhmen mund të ndodhin shumë gjëra, por unë tani jam pjesë e PSG-së dhe nuk kam ndërmend të largohem. Nëse kjo skuadër rritet bashkë me mua, s'kam asnjë qëllim të iki". VARAN- "Do të përballem me të në Champions. Kam raport të shkëlqyer dhe ai lojtar është një shembull që duhet ndjekur. Është profesionist, i respektuar dhe ka fituar shumë tituj. Jemi të lumtur që e kemi në kombëtaren franceze". FRANCA- "Nuk jemi favoritët për ta fituar këtë kompeticion. Është Spanja, Anglia dhe Brazili. Por edhe ne do të bëjmë gjithçka dhe do të tregojmë që kemi forcë. Në të shkuarën kam pasur idhull Zidanin. Por, atë e duan edhe tani në Francë. Ajo që po bën te Reali është e mrekullueshme dhe është një trajner i madh".