Van Dijk te Liverpuli për 75 mln paund
Holandezi 26-vjeçar bëhet mbrojtësi më i shtrenjtë në histori
Goditja më e madhe e merkatos së janarit ka ardhur ndoshta që përpara se ajo të çelet zyrtarisht. Virgil Van Dijk është zyrtarisht një futbollist i Liverpulit. Lajmi është zyrtarizuar nga të dyja klubet dhe në arkat e Sauthemptonit shkojnë 75 milionë paund (afro 84 milionë euro). Holandezi bëhet kështu mbrojtësi më i shtrenjtë në historinë e futbollit. Van Dijk kreu vizitat mjekësore ditën e mërkurë dhe Liverpuli njoftoi lajmin me një foto të holandezit postuar në "Twitter" duke pozuar me fanellën me numrin 4 përpara pemës së Krishtlindjes në shtëpinë e tij. Bisedimet për transferimin e 26-vjeçarit u intensifikuan gjatë ditëve të fundit dhe ai u la jashtë nga Sauthemptoni në ndeshjen kundër Totenhemit. Edhe Mançester Siti ishte në negociata me lojtarin, por nuk pranoi kurrsesi që të paguante një shifër të tillë. Nga 75 milionë paundët që e bëjnë Van Dijkun blerjen më të shtrenjtë në historinë e "reds"-ave, 10% (7.5 milionë) do të shkojnë për ish-klubin e tij, Sëlltikun. Lojtari pritet që të fitojë rreth 200 mijë paund në javë nga kontrata në "Anfield", kohëzgjatja e së cilës nuk bëhet ende me dije. Van Dijk ishte një objektiv i Klopit që në merkaton e verës, aq sa Sauthemptoni kërcënoi me gjyq Liverpulin se i ishte afruar në mënyrë të paligjshme futbollistit të tyre duke sjellë më pas edhe ndjesën dhe tërheqjen e "reds"ave. Por vullneti i futbollistit ishte që të transferohej në "Anfield" dhe dëshira e tij vendosi në fund. Van Dijk pritet të jetë zgjidhja e problemeve në mbrojtje për skuadrën e kuqe, e cila e ka pasur gjithnjë prapavijën Thembrën e saj të Akilit.