Idrizi “paqe” me Kushtën, Ruci: Shijon buka e Flamurtarit, jo e FSHF-së
Ruci: Buka e FSHF-së të ngec në fyt, kjo është e ëmbël
Një darkë legjen dash në Vlorë. Janë pikërisht ata, legjendat e Flamurtarit të artë, që bënë krenar një qytet, por jo vetëm. Administratori i klubit, Sinan Idrizi, theu "akujt" dhe bëri bashkë ish-futbollistë dhe ish-trajnerë të shquar të Flamurtarit ndër vite. Të martën, në një nga restorantet buzë detit, kreu i klubit shtroi një darkë në kuadër të festave të fundvitit. Pjesëmarrës ishin futbollistë të viteve '80-'90, si dhe stafi aktual i klubit. Atmosfera ka qenë mjaft e këndshme mes humorit dhe batutave. Darka festive është hapur nga ish-futbollistë të viteve '80-'90, ish-trajneri kampion i Flamurtarit, Edmond Liçaj, si dhe mjeshtri i madh, Mexhit Haxhiu. Mbrëmja u hap me fjalimin e këtij të fundit. "Unë komplimentoj administratorin Idrizi dhe trajnerin Duron. Flamurtari po drejtohet me kompetencë nga trajneri Duro. Ekipi funksionon mirë dhe shpresojmë që në vitin 2018, ta shikojmë në Kupat e Europës, e pse jo kampion", ka thënë Haxhiu. Ndërsa Idrizi, në fjalën e tij, i ka cilësuar ish- futbollistët si nder dhe krenari për Flamurtarin. "Kjo është një mbrëmje me ata që i kanë dhënë emrin, nderin dhe krenarinë Flamurtarit. Më mirë se kaq nuk ka ku të shkojë. Janë këta që kanë krijuar Flamurtarin dhe janë të gjithë bashkë. Ndihem shumë mirë mes tyre. Kjo që po them është për ata djem që nuk kanë sy që të shohin. Këta janë fytyra reale e fanellës së Flamurtarit. Mund të ketë ndonjë mungesë për çështje organizimi apo çorganizimi, por pjesa më e madhe është këtu", u shpreh Idrizi.
PIKANTET
"Panorama Sport" zbardh gjithçka ndodhi në mbrëmjen e së martës, që nga "pajtimet", e deri te humori, kënga, vera dhe dollma me kaposh, e cila ishte edhe menyja kryesore e darkës. Përpara se mbrëmja të niste, administratori i Flamurtarit dhe drejtori Ardi Behari përfituan për të bërë disa batuta me gazetarët e ftuar. Ndërsa në kohën kur ishlojtarët po futeshin në sallë, Idrizi ka kërkuar që të ulet në një tavolinë me Sokol Kushtën. "Në tavolinën time më sillni Sokolin. E dua atë djalë, edhe pse e kam pasur opozitar të fortë, por më pëlqen qëndrimi i tij. Le të pajtohemi sot!", ka qenë "urdhri" i Idrizit. Dhe në fakt kështu ka ndodhur. Administratori takohet përzemërsisht me Kushtën dhe më pas ulen së bashku në tavolinë. Në krahun e majtë të Idrizit qëndron Kushta, ndërsa në të djathtë Mexhit Haxhiu. Për herë të parë dhe pas shumë debateve publike në distancë, Idrizi dhe Kushta gjejnë kohën të diskutojnë për plot tri orë për "hallet" e Flamurtarit.
Këtë herë tonet ishin të zbutura, me shaka dhe trokitje gotash. Ndërkohë, drejtori i klubit, Ardi Behari, preferoi të ulej në një tavolinë tjetër, me dashamirës dhe mbështetës të Flamurtarit. RUCI & CO
E ndërsa në mbrëmjen e shtruar nga FSHF-ja javën e kaluar, Vasil Ruci nuk shkoi, dje nuk mund të mungonte në krah të bashkëlojtarëve. Ai këtë herë e pranoi me kënaqësi ftesën. Këtë gjë e shprehu edhe në mbrëmje, teksa po bënte batuta me disa nga shokët e skuadrës së viteve '80. "Në mbrëmjen e FSHF-së nuk shkova se ajo bukë të ngec në fyt, ndërsa sot erdha, pasi kjo e Flamurtarit është bukë e ëmbël", tha ish- sulmuesi i shquar. Ndërsa ishfutbollistët e Flamurtarit si, Rrapo Taho, Kreshnik Çipi, Latif Gjondeda, Eqerem Memushi, Përparim Lushaj, Roland Iliadhi, Luan Birçe dhe Gerd Haxhiu, kanë qenë së bashku në një tavolinë. Ata ishin edhe më energjikët, teksa kënduan live himnin e Flamurtarit dhe këngë të tjera duke kujtuar me nostalgji të shkuarën.
Atmosfera ka qenë shumë e ngrohtë, ku njerëzit e sportit jo vetëm kanë kujtuar ato kohë të arta, por edhe kanë shkëmbyer batuta e mesazhe duke u bërë bashkë pas shumë vitesh. Eqerem Memushi kishte marrë me vete një foto të vjetër të Flamurtarit të atëhershëm, të cilën e kishte vendosur në kornizë dhe kjo gjë tërhoqi vëmendjen e Idrizit, i cili qëndroi për disa minuta në tavolinën ku ndodhej Memushi. Vlen të theksohet se në këtë mbrëmje mungonte trajneri Shpëtim Duro dhe thuajse të gjithë futbollistët, për shkak se ekipi ka marrë pushimet. Nga lojtarët ishin vetëm tre, pikërisht brazilianit Danilo Alvesh dhe Viktor Xhufo, si dhe sulmuesi nga Mali, Ibrahima Tungara. Këta të fundit kanë preferuar që edhe festat e fundvitit t'i kalojnë në Vlorë.