Partizani, skuadra me pushimet më të gjata
Gabimet e verës mund të përsëriten sërish te të kuqtë e kryeqytetit në janar
E mbani mend Partizanin e periudhës së verës, i cili ishte klubi që kreu pushimet më të gjata, afroi 15 lojtarë dhe që ishte skuadra me më pak ndeshje miqësore gjatë fazës intensive përgatitore? E njëjta gjë mund të përsëritet edhe në dimër te "demat e kuq". Për shkak të axhendës që ndoqën në verë pati ankesa nga stafi teknik në periudhën e parë të sezonit, pasi ata thanë se ekipi vinte nga pushime të gjata dhe i duhej kohë që të harmonizohej, koha në dispozicion nuk ishte e mjaftueshme, si dhe zhvilluan vetëm tri ndeshje miqësore. Situata aktuale e klubit ngjan shumë me atë që ndodhi në verë. Që nga 22 dhjetori dhe deri më sot te të kuqtë mbizotëron një atmosferë përgjumje, gjë e cila ka sjellë edhe shqetësimin e dashamirësve të skuadrës që shpresojnë se drejtuesit e rinj do të ndjekin një politikë ndryshe nga e shkuara. Ashtu si në verë, edhe merkatoja e dimrit e gjen Partizanin si klubin me pushimet më të gjata. Ndonëse thuhet se drejtuesit e kanë gjithçka gati, duke filluar nga përforcimet dhe faza përgatitore, axhenda e "demave" u zbulua mbrëmë. Ja njoftimi i klubit për axhendën e minifazës përgatitore në Antalia: "Viti 2018 do të rikthejë në fushë skuadrën në 6 janar, datë kur edhe do nisin zyrtarisht përgatitjet. Në kompleksin sportiv të Ekipeve Kombëtare në Kamzë, grupi i lojtarëve do të zhvillojë edhe seancën e parë në program, në orën 16: 00. Ekipi do të qëndrojë në kryeqytet deri më datën 8 janar për të udhëtuar më pas drejt Turqisë në Antalia, ku do të kryejë fazën përgatitore. Përgjatë qëndrimit 10-ditor në Antalia, 15 herë kampionët e vendit do të luajnë edhe 2 ndeshje miqësore. Në datën 12 janar të kuqtë do të përballen me ekipin turk, Kasimpasha, ndërsa më 15 janar me ekipin uzbekistanas, Pakhtakor Tashkent". Në ditët e fundit të dhjetorit u përfolën shumë emra si alternativa të mundshme për Partizanin në merkaton e dimrit, por deri tani klubi ka zyrtarizuar vetëm dy afrime, Bruno Telushin dhe Esat Malën. Por në dallim nga e shkuara, mësohet se plani i merkatos tani është përqendruar në pak duar dhe përgjegjësi kryesor mbetet drejtori i sapoemëruar, Olsi Rama.