Revolucion te Erzeni, Elvis Plori merr drejtimin e skuadrës
Ikin dy lojtarë, ish-presidenti Hoxha bëhet drejtor
Viti i Ri për klubin Erzeni ka nisur me revolucion. Kështu, të mërkurën në mesditë janë bërë shumë ndryshime. Ish-presidenti Astrit Hoxha është emëruar në detyrën e Drejtorit të Përgjithshëm të klubit Erzeni. Ndërsa kanë qëndruar në vendet e tyre për futbollin administrator, Altin Keci, po ashtu edhe ai i volejbollit. Gjithashtu, ndryshimet kanë prekur edhe stafin teknik, ku ka dhënë dorëheqjen trajneri Dorian Bubeqi dhe në vend të tij është emëruar Elvis Plori. Së bashku me Bubeqin është larguar edhe ish-fizioterapisti kavajas i Erzenit. Për herë të parë në klub është vendosur një menaxher, Gëzim Peza, i ngarkuar me detyrën e gjetjes së futbollistëve. Ndërsa Sabri Kalleshi është caktuar si trajner i moshave. Futbollistët e larguar janë Erald Deliallisi dhe Aldo Mitraj. Ndërsa dje në mesdite është bërë edhe prezantimi zyrtar në ambientet e Pallatit të Kulturës në prani të futbollistëve të Erzenit dhe të fansave të kësaj skuadre, prezantim që u bë nga administratori për futbollin, Altin Keci. Në këtë prezantim të gjerë pa dyshim vendin kryesor e zuri emërimi i zotit Astrit Hoxha në postin e drejtorit për klubin sportiv "Erzeni". HOXHA - Astrit Hoxha rikthehet kështu pas një periudhe të gjatë në drejtimin e skuadrës shijakase si një president i suksesshëm i viteve 2000-2004 me Erzenin në Kategorinë e Parë, sot Superiore. Në fjalën e tij të parë të prezantimit, ai vlerësoi Bashkinë për besimin e dhënë. "Është një vlerësim që më bëhet mua, por edhe një përgjegjësi e madhe për të bërë ndryshimet pozitive për sportin dhe në veçanti për futbollin. Ndryshimet e bëra natyrisht më obligojnë për të qenë gjithmonë korrekt në kryerjen e detyrës, në forcimin e disiplinës të stafit teknik dhe atij drejtues, të futbollistëve për të
bërë sa më shpejt përmirësimet e nevojshme. Aktualisht, për futbollin krahas largimit të dy futbollistëve Deliallisi dhe Mitraj, do të bëjmë zëvendësimin e tyre. Në bashkëpunim me trajnerin Plori dhe menaxherin Gëzim Peza, do të fillojmë sa më shpejt përgatitjet për vitin e ri. Pa dyshim, si detyrë imediate mbetet që në periudhën e mbetur të kampionatit të mos heqim dorë nga synimi për elitën, por kryesorja do të jetë klasifikimi në 5- shen e parë dhe konsolidimi i një ekipi për sezonin e ardhshëm, në të cilin synojmë ngjitjen në elitë", tha Hoxha. Fiqiri Shehu