Barcelona nis sulmin e fundit për Kutinjon
Spanjollët ofrojnë 130 mln, Liverpuli kërkon 150
Telenovela e Kutinjos rinisi dhe kushedi se kur do përfundojë. "Mundo Deportivo" propozonte dje në kopertinën e saj një foto të brazilianit pranë një llogarie të thjeshtë, ku 110 i shtoheshin 40. Shuma prej 150 përkon me milionët që katalanasit po përgatisin të derdhin në arkat e Liverpulit ( aktualisht janë ndalur në 130) për të siguruar sulmuesin. 110 milionë mendohet të jetë kosto e kartonit ndërsa 40 milionë të tjera do të jenë bonuset që katalanasit do t'i paguajnë Liverpulit. Nëse kjo marrëveshje arrihet, klubi anglez do të realizonte një plus valencë të frikshme, pasi disa vite më parë paguante vetëm dhjetë milionë euro për brazilianin që largohej nga Interi si dështimi i radhës. Edhe klubi italian mund të përfitojë nga shitja e Kutinjos. Si promovues i sulmuesit në fazën e parë të karrierës së tij si profesionist, zikaltrit kanë të drejtën e një përqindjeje nga shitja e tij dhe në këtë rast vlera arrin deri në 2 milionë euro. Sipas mediave angleze, menaxherët Kia Jorabçian dhe Xhuliano Bertoluçi ndodhen në Londër, ku synojnë të arrijnë akordin faraonik mes palëve.
KLOP
Trajneri Jyrgen Klop nga ana e tij e di fare mirë se si funksionon merkato, sido-
mos kur në valle janë qindra miliona euro. Tekniku i Liverpulit ka reaguar përpara derbit të sotëm të kupës me Evertonin në lidhje me këtë temë: "Nuk kam asgjë për të thënë që do të më ndihmonte mua, lojtarin apo klubin. Nëse
kërkoni përgjigje tek unë gaboheni, 80 për qind prej jush këtu janë këtu për Kutinjon, por s'do të them asgjë, pasi çfarëdo që të deklaroj, ju do ta interpretoni dhe do të ndërtoni historinë që keni në plan të shkruani".