Besa, dy talente nga Kosova
Vijnë Fatjon Bushati i Ballkanit dhe Bler Thaçi i KEK-ut, sot pritet një sulmues cilësor
Besa ka nisur revolucionin e dimrit. Një gjë e tillë ishte paralajmëruar që gjatë dhjetorit, ku u zyrtarizuan edhe largimet e para. Ndërsa, ishte vetë presidenti i skuadrës, Nexhat Bizhdili, i cili në një intervistë ekskluzive për gazetën bëri të ditur se gjatë merkatos së janarit do të ketë shumë afrime. Gjithçka nisi me portierin e larguar nga Luftëtari, Festim Miraka, për të vazhduar me mbrojtësin e Teutës, Dajan Shehi, dhe dy mesfushorët e huazuar nga klubi gjirokastrit dy ditë më parë, Brixhild Brahimaj dhe Mikel Hoxha. Dje ka qenë radha e dy goditjeve të radhës. Këtë herë, Besa ka kthyer sytë nga Kosova duke siguruar shërbimet e dy mesfushorëve. Gjatë seancës së djeshme stërvitore, trajneri Bledar Sinella ka pasur në dispozicion të gjithë grupin me përjashtim të Shehit, i cili pritet t'i bashkohet Besës më 8 janar.
LOJTARËT
Për sa u përket futbollistëve kosovarë, janë të dy lojtarë të rinj dhe drejtuesit kavajas kanë shumë besim tek ata. Bëhet fjalë për 19-vjeçarin Fatjon Bushati, i cili vjen nga ekipi i Ballkanit të Suharekës dhe luan mesfushor qendre. I dyti është Bler Thaçi, edhe ky mesfushor anësor me tipare sulmuese. Thaçi ka luajtur për ngjyrat e ekipit të KEK-ut gjatë pjesës së parë të kampionatit. Krahas këtyre lojtarëve të konfirmuar si pjesë e Besës, në seancën
e djeshme stërvitore u paraqitën edhe një qendërmbrojtës dhe një sulmues. Stafi teknik do të vendosë gjatë ditëve në vazhdim nëse këta të dy do qëndrojnë ose jo. Merkato nuk do të mbyllet këtu, pasi sot pritet të afrohet një sulmues i rëndësishëm, emri i të cilit mbahet i fshehtë nga drejtuesit.
LARGIMET
Ndërkaq, vazhdojnë largimet nga Besa. Mësohet se edhe Aldo Dervishi dhe Xhino Ngjela nuk do të jenë më pjesë e Besës. Emrush Kaloshi është dëmtuar e me sa duket e ka mbyllur sezonin. Pritet kështu që formacioni verdhezi të ketë mbi 80% ndryshime nga ai i pjesës së parë të kampionatit. Besohet se vetëm Meglid Mihani, Skerdilajd Perja dhe Denis Biba mund të mbeten pjesë e formacionit të Besës për kampionatin në vazhdim. Kavajasit e nisën me synime të mëdha kampionatin duke besuar te ngjitja në Superiore, por pas pjesës së parë të kampionatit janë shumë larg kreut.