Juventusi fiton, por Dibala del në lot nga fusha
Shtylla dhe raste, por sardëve u mohohet një penallti pas disavantazhit
Intuita, ajo shkëndijë që shpeshherë i vjen në orët e vona të mbrëmjes, edhe këtë herë i rezultoi fituese. Masimiliano Alegri në Kaljari hoqi dorë nga "ushtari" i tij i besuar, Manxukiç, për t'i dhënë një shans Bernardeskit dhe pati sërish të drejtë: gol trepikësh për ishyllin e Fiorentinës. Juventusi vuan në Sardenjë, sepse humb Dibalën për një dëmtim, i rëndë, duke parë lotët e argjentinasit, por edhe Khedirën, dhe vazhdon të mbetet në trajektoren e Napolit. Kaljari, nga ana e tij, del me kokën lart nga fusha për rastet e krijuara dhe ndoshta ndihet edhe i "grabitur" për një penallti të mohuar, për prekje me dorë të atij që vendosi ndeshjen për bardhezinjtë.
SHTYLLA DHE PRITJE
Juventusi e nis me marshin e pestë, aq sa brenda 17 minutave sheh tre gola të munguar për çështje milimetrash: Dibala godet traversën me goditje dënimi, Bernardeski shkund shtyllën, ndërsa Rafael shpëton mrekullisht goditjen me kokë të Khedirës. Gjithsesi, Kaljari është i gjithi grintë e shpirt, sepse në mesfushë është i ashpër me Faragon dhe Barelën, por edhe i rrezikshëm në sulm. Këtë e kupton mirë Shezni, i cili bën një fluturim të çmendur, për të ndalur goditjen me kokë tokazi të Pavoletit, por me portierin polak që, pak përpara pauzës, ndalon edhe Farian, duke e devijuar topin në shtyllë. Për t'u shënuar edhe një gol i anuluar ndaj juventinit Benatia për pozicion jashtë loje. DËMTIME DHE AVANTAZH
Pjesa e dytë nis me Kaljarin e rrezikshëm, sërish me Pavoletin me kokë, ndërsa Alegri humb dy "armë" të rëndësishme. I pari që lë fushën është Dibala, për një dëmtim muskulor, i cili duket serioz, duke parë lotët
e numrit 10, ndërsa pak minuta më vonë edhe Khedira largohet, pas një grushti që merr nga Shezni, pas një daljeje të shokut të tij të ekipit. Një tjetër që "plagoset: është edhe Kielini, i cili e mbyll ndeshjen i fashuar, në kokë. Në vend të dy të larguarve,
Kosta dhe Manxukiç, Juventusi është i rrezikshëm. Pasi provojnë Pjaniç e Kosta, ky i fundit i dhuron asistin Bernardeskit për golin e avantazhit, me sulmuesin që shtyn lehtësisht në rrjetë. Kaljari proteston pak minuta më pas, pasi autori i golit
prek një top me dorë në zonë, një penallti e qartë e mohuar të zotëve të shtëpisë, duke parë krahun e hapur të numrit 33, por në fund, pushimet 10-ditore do të jenë të lumtura për bardhezinjtë, me ekipin që do të bashkohet në stërvitje më 16 janar.