Nisin spastrimet te “demat”, Lukas i bashkohet grupit në Turqi
Adorjan, Xhixhiua dhe Uarlej nuk u paraqitën dje
Prezenca në seancën e parë stërvitore ka pasur domethënie të madhe te Partizani. Ishte thënë se ata që nuk do të ishin prezentë në seancën e djeshme, automatikisht konsiderohen si të larguar nga klubi. Kristjan Adorjan, Mustafa Xhixhiua dhe braziliani Uarlej Alvesh nuk ishin prezentë në stërvitjen e djeshme. Për mosprezencën e tyre, burime nga klubi bënë me dije se atyre u është dhënë disa ditë më shumë leje duke mos e shqiptuar fjalën "të larguar". Duke pasur eksperiencën e çështjes "Sukaj", i cili ende konsiderohet me leje nga klubi, por që është prezantuar te Vllaznia, tre futbollistët e huaj
hyjnë te lista e spastrimeve. Mosprania e Adorjanit, Xhixhiuas dhe Uarlejt ishte e pritshme, pasi prej kohësh është thënë se ata nuk janë në planet e drejtuesve për pjesën e dytë të sezonit. Edgar Çani nuk ka qenë prezent dje në seancën e parë, por dihet që lojtari do të vijojë fazën riaftësuese në Itali pranë
klinikës ku është operuar dhe pritet që t'i bashkohet ekipit pas kthimit nga Turqia. Lukas Kardozo konsiderohet si afrim i të kuqve në merkaton e dimrit, por klubi kryeqytetas ende nuk e ka prezantuar brazilianin e Pelisterit. Sulmuesi nuk ka qenë i pranishëm dje në seancën e parë, por pritet që t'i bashkohet ekipit në Antalia. Për momentin Partizani ka zyrtarizuar dy afrime, Bruno Telushin dhe Esat Malën, por edhe braziliani Lukas hyn te prurjet e merkatos së dimrit. I pranishëm në ambientin stërvitor dje ka qenë edhe mbrojtësi Arbnor Fejzullahu, i cili para tre muaj ka kryer një operacion në këmbën e djathtë. Fejzullahu pritet që së shpejti të nisë vrapimet në fushë, por nuk do të jetë pjesë e skuadrës në fazën përgatitore në Turqi. Arbnor Fjezullahut i duhet akoma kohë që të rikuperohet plotësisht dhe me shumë gjasa ai mund të jetë gati për ekipin vetëm në fazën e katërt.