Objektiva dhe merkato, Mezani tregon Laçin
Laçi ishte një nga skuadrat surprizë të këtij sezoni futbollistik. Ekipi që drejtohet tre muajt e fundit nga trajneri vlonjat, Gentian Mezani, mban me meritë vendin e tretë në Kategorinë Superiore dhe me të drejtë pretendon një vend në Europë. Për të arritur këtë objektiv, kurbinasit janë përforcuar në merkato me futbollistë të rij. "Ka ardhur Shtubina, Beqja dhe Zogaj, ndërsa jemi në bisedime edhe me një qendërmbrojtës dhe presim ta mbyllim marrëveshjen këto ditë. Nuk presim më afrime të tjera, por vetëm të përqendrohemi të pjesa e dytë e kampionatit. Grupi mendoj se është i shëndoshë, me element të rinj, por i gërshetuar edhe me ata me përvojë. Një element pozitiv është fakti që afrimet u bënë shpejt për t'i pasur në dispozicion që nga dita e parë e përgatitjeve", ka thënë trajneri Mezani në një prononcim për "SuperSport". OBJEKTIVAT - Duke parë ecurinë e mirë të deritanishme, trajneri e pranon se ka pritshmëri të mëdha për ndeshjet e ardhshme të Superiores. "Normalisht është vit i ri, por ashtu si në vitin e shkuar, kam dëshirë që të bëjmë mirë edhe këtë vit. Kjo do të na bëjë mirë, si për pozitat tona, ashtu edhe për objektivat. Jemi një skuadër e re dhe nuk duam t'i vendosim çunat në presion me objektiva. Ndeshja e radhës është objektivi ynë i vetëm, ashtu siç kemi bërë deri tani, me qëllim që të grumbullojmë sa më shumë pikë. Europa është e vështirë, si nga kampionati, ashtu edhe nga Kupa, por te kjo e fundit, rruga është pak më e shkurtër", ka vazhduar Mezani, ndërkohë që skuadra e tij do të jetë nga të paktat që do ta zhvillojë fazën përgatitore në Shqipëri. "Mënyra jonë e lojës do të jetë gjithmonë ajo, por do të tentojmë ta perfeksionojmë edhe më shumë. Pas 3 muajsh mund të them se skuadra i ka përthithur mirë idetë e mia dhe ka marrë identitetin tim. Lojtarët më janë përgjigjur mirë në pjesën e parë të sezonit dhe besoj se do të vijojnë të më përgjigjen edhe në vazhdim", ka mbyllur tekniku.