Luftëtari i bën ofertë një gjiganti nga Senegali

Klubi pret qendërmbrojtësin Xhekson Mendi

Luftëtari ka zyrtarizuar deri më tani afrimin e katër lojtarëve në merkaton e janarit. Bëhet fjalë për sulmuesin Vasil Shkurtaj, i cili është gati për të luajtur pas problemeve me dokumentacionin, si dhe të rinjtë Kejdi Balla (sulmues) dhe David Bocaj (mesfushor). I katërti është portieri Amarildo Çekrezi, i cili do t'i bashkohet ekipit sot në Antalia, aty ku prej së shtunës gjirokastritët kanë nisur minifazën përgatitore. Njëkohësisht klubi ka bërë parakontratë me mesfushorin e Pogradecit, Jugers Liçkollari, por këtë të fundit do ta ketë të gatshëm vetëm në sezonin e ri, pasi ka edhe 6 muaj kontratë me

skuadrën e vendlindjes. Ndërkohë, burime të sigurta të "Panorama Sport" në klub kanë treguar dje se te bluzinjtë pritet të mbërrijnë edhe tre lojtarë të tjerë. Bëhet fjalë për një qendërmbrojtës, një mesfushor dhe një sulmues. Gazeta zbulon se qendërmbrojtësi që po tentojnë të afrojnë gjirokastritët

është një emër i njohur në kampionatin grek, teksa vetëm pak ditë më parë ka prishur kontratën me klubin e Levadhiakosit. Bëhet fjalë për senegalezin me pasaportë franceze, Xhekson Mendi, i cili tetë vite më parë ka luajtur edhe në Bundesligën gjermane me Fraiburgun. Në pjesën e parë të këtij sezoni lojtari ka qenë titullar i padiskutueshëm te Levadhiakos. Luftëtari pret një përgjigje zyrtare nga 30-vjeçari, ardhja e të cilit mund të mbyllte problemet në mbrojtje, duke fuqizuar së tepërmi skuadrën.

MINGA - Një gjirokastrit për Luftëtarin. Bëhet fjalë për sulmuesin e krahut, Kristo Minga, i cili gjithë karrierën e tij e ka zhvilluar në Greqi. 33-vjeçari është futur në bisedime me klubin dhe gjasat janë që të arrihet një marrëveshje. Lojtari ka qenë pjesë e disa në ligën e dytë greke si Trikalla, Panseraikos, Ergotelis, Panthrakikos etj. Tomor Shehu