Besëlidhja, “pazar” tek Erzeni
Lojtari pëlqehet nga presidenti Noka, priten goditje të tjera në merkaton e janarit
Nën drejtimin e teknikut Gledis Lani, Besëlidhja zhvilloi dje seancën e radhës stërvitore. Ndonëse është dita e tretë e grumbullimit për këtë vit, ende nuk ka asnjë zyrtarizim për sa i përket merkatos. I vetmi lojtar i afruar është sulmuesi serb, Kosta Bajiç, i cili stërvitet prej një muaji me lezhjanët dhe do të jetë gati për të luajtur në pjesën e dytë të kampionatit. Por, drejtuesit janë duke punuar në fshehtësi për të afruar futbollistë në këtë merkato janari. Dhe një prej emrave të preferuar të presidentit Gjok Noka është mesfushori i Erzenit, Alfred Deliallisi. Mësohet se presidenti e pëlqen 24- vjeçarin dhe kërkon që ta ketë në ekip për pjesën e dytë të kampionatit. Lojtari është i lirë për momentin, pasi vetëm tri ditë më parë u largua nga skuadra shijakase. Pritet që Deliallisi t'i bashkohet Besëlidhjes. Ai ka qenë titullar i padiskutueshëm, ku është aktivizuar në të 12 ndeshjet e luajtura. Gjithashtu, edhe te Kamza, me të cilën ka luajtur për dy vite, ka qenë titullar.
DIBRA
Mbrojtësi dhe njëkohësisht kapiteni i Besëlidhjes, shkodrani Kledi Dibra, për "Panorama Sport" shprehet: "Sapo nisëm fazën përgatitore në kuadër të gjysmës së dytë të sezonin në vijim. Si fillim janë grumbulluar futbollistët që mbyllën gjysmën e parë të sezonit, por në ditët në vijim priten të tjerë që t'i bashkohen skuadrës në stërvitje. Gjysma e parë e sezonit për ne ishte jo e suksesshme dhe për këtë jemi 11 pikë larg kreut, por kjo gjendje mund të përmbyset shumë shpejt nëse do të mobilizohemi maksimalisht për të dhënë më të mirën e kapacitetit tonë. Besëlidhja është një skuadër që ia vlen të sakrifikosh dhe besoj se të gjithë futbollistët e organikës e kanë të qartë këtë, ndaj tani sapo kemi nisur stërvitjen e janarit që për mua është shumë e rëndësishme për të marrë ngarkesat e duhura nga të gjitha pikëpamjet që i shërbejnë një futbollisti profesionist. Shpresoj se gabimet e gjysmës së parë të sezonit do të na shërbejnë për të reflektuar seriozisht dhe nëse kjo do të bëhet normë në skuadër, jam i sigurt që do të kemi sukses", u shpreh shkodrani Kledi Dibra në prononcimin e tij për gazetën.