Pritet Shehi dhe një sulmues, Kaja ikën zyrtarisht
Besa vazhdon të jetë shumë aktive në këtë merkato
Besa po ecën me shpejtësi drejt konturimit final të grupit që do përballojë pjesën e mbetur të sezonit. Ndryshe nga merkato e muajit gusht, kur duhet pranuar se Besa dështoi, merkato e janarit duket shumë shpresëdhënëse. Emra të tillë si Miraka, Shehi, Brahimaj, Hoxha, Thaçi, Bushati, por edhe ndonjë prurje të orës së fundit, ndryshojnë totalisht fytyrën e Besës. Nga ekipi tashmë janë larguar Kaloshi, Hoxha, Kaja, Morina, Isufi, Dervishi, Ngjela dhe për shkak dëmtimi edhe Emrush Kaloshi që duket se e ka mbyllur këtë sezon. Pra, Besa është thuajse e riformatuar 80% pa folur për rezervat. Pas prurjeve të fundit dhe largimeve, verdhezinjtë kanë përcaktuar edhe kalendarin e muajit janar. Përpara kësaj është saktësuar tashmë se qendërmbrojtësi Dajan Shehi dhe një sulmues do t'i bashkohen ekipit nesër në startin e minifazës përgatitore. Kështu, nga nesër do të startojë minifaza përgatitore, e cila do të zgjasë deri në datën 20 janar. Kjo fazë do të zhvillohet në Kavajë duke shfrytëzuar resurset turistike edhe të plazhit. Do të zhvillohen dy seanca stërvitore në ditë, njëra në përgatitje fiziko-atletike në bregdetin e Golemit e tjetra
në aneksin stërvitor të ekipit. Krahas tyre janë parashikuar të zhvillohen edhe 2-3 teste miqësore, qoftë me ekipet e Superiores, apo skuadra nga Kosova që siç ndodh çdo vit do ta zhvillojnë fazën përgatitore në Kavajë. IKËN KAJA - Dje është parë në ambientet e stërvitjes edhe ishqendërmbrojtësi
i Besës, Ervis Kaja. Siç dihet, mbrojtësi u largua në prag të sfidës së fundit me Tërbunin duke sjellë edhe pakënaqësi te drejtuesit. Mësohet se pas takimit të tij të fundit me presidentin Nexhat Bizhdili, ai është ndarë kështu në paqe me fanellën verdhezi. Feriz Ferizaj