WADA: Skandali në Rusi, mund të jetë përfshirë edhe shteti
Siç është bërë me dije dhe më parë, Komiteti Olimpik Ndërkombëtar (IOC) ka pezulluar përgjithnjë 11 sportistë rusë të garave dimërore, pasi kanë thyer rregullat antidoping në Lojërat Olimpike "Sochi 2014". Mes personave të përjashtuar nga sporti rus janë edhe medalistët Tatjana Ivanova e Albert Demçenko, të dy fitues të medaljes së argjendtë në Olimpiadën e fundit dimërore. Dënimi dhe pezullimi i tyre ka ardhur si rezultat i hetimeve që IOC dhe Antidopingu ndërkombëtar (WADA) kanë kryer muajt e fundit në Rusi, një vend i përfshirë nga një skandal i madh dopingu. Edhe pse Rusia është e pezulluar përkohësisht nga evenimentet sportive ndërkombëtare, ky dënim mund të konsiderohet i lehtë, sepse sipas Agjencisë Ndërkombëtare Antidoping (WADA) skandali i dopingut në këtë shtet është i përfshirë në përmasa të jashtëzakonshme. Të dhënat e fundit të zbuluara nga një kompjuter në një laborator të antidopingut në Moskë tregojnë se janë mijëra sportistë e sportiste të përfshirë në këtë skandal. Ajo që është zbuluar deri më tani, mund të jetë vetëm "maja e ajsbergut" e kësaj plage të pashërueshme. Mashtrimi me dopingun mund të jetë shumë herë më i madh nga ai që është zbuluar deri më tani dhe personeli i WADA-s, që po ndjek çështjen, është duke studiuar me kujdes të dhënat e zbuluara nga kompjuteri laboratorik i Moskës. Në këtë skandal është përfshirë edhe vetë shteti rus, duke udhëhequr përdorimin e dopingut dhe fshehjen e rezultateve. Në Rusi janë qindra sportistë të pezulluar apo përjashtuar përgjithnjë nga sporti prej këtij skandali të dopingut. Hetimet ndërkohë po vijojnë, rezultatet e të cilëve do t'i përcillen së shpejti edhe Komitetit Olimpik Ndërkombëtar (IOC).