Napoli ruan kreun, Atalanta mund Romën

Kajehon dhe Kulibali mjaftojnë për fitoren, bergamaskët thellojnë krizën verdhekuqe

Dy shtylla, shumë raste dhe Napoli, deri gjysmëore përpara përfundimit të sfidës ndaj Veronës, po i afrohej një barazimi të rrezikshëm në shtëpi. Pikërisht, ndoshta në momentin më pak të pritshëm, Kulibali lë mbrojtjen dhe u jep kryesuesve të Serisë A golin që zhbllokon sfidën. Çerekore më pas, një tjetër shkëndijë e Kajehon dhe Napoli siguron tri pikët që e mbajnë ende në vendin e parë. Djemtë e Mauricio Sarrit e nisin sfidën me durimin e zakonshëm duke krijuar volum loje në pritje të momentit për të goditur. Skenari dihet dhe Hysaj me shokë e respektojnë me përpikëri në një sfidë që dukej e lehtë vetëm në letër. Në minutën e 17- të, Mertens hap sfidën, por teknologjia anulon me të drejtë golin e belgut, me Napolin që krijon raste pa fund e më në fund arrin edhe frytet e punës së saj. Roma- Nuk mbaron momenti i krizës për Romën, e cila në pesë ndeshjet e fundit në kampionat ka korrur vetëm pesë pikë. Verdhekuqtë u mundën në fushën e tyre nga Atalanta e Etrit Berishtës, e cila me fitoren e djeshme parakaloi katër ekipe (Milan, Torino, Udineze e Fiorentina) dhe renditet në vendin e shtatë. Kornelius dhe De Ron u dhanë avantazhin e dyfishtë zikaltërve, përpara se Roma të shkurtonte distancën me Xhekon, i cili u asistua nga El Sharaui. Djemtë e Di Françeskos nuk përfituan dot as pasi luajtën të gjithë pjesën e dytë me një lojtar më shumë duke qenë se Atalanta humbi De Ron për shkak të dy kartonëve të verdhë në 45 minuta. Roma, aktualisht e pesta, kapërcehet edhe nga Lacio duke komplikuar rrugëtimin për vendet e para.