Idrizi ironizon FSHF-në: Na sollën më shpejt “plakat e marsit”
"Kemi dosjen gati, Federata legalizoi informalitetin"
Sinan Idrizi reagon për datën e përcak tuar nga Komiteti Ekzekutiv për zgjedhjen e presidentit të ri të FSHF-së. E ndërsa "erën e re", Idrizi e kishte parashikuar në mars, data e zgjedhjeve do të jetë 7 shkurti. Kreu i klubit vlonjat është i prerë në qëndrimin e tij kundër presidentit aktual, Armand Duka, ku Idrizi nuk nguron që votën e tij ta thotë edhe publikisht. Teksa e përcjell me batutë çështjen e datës së zgjedhjeve të presidentit të ri të FSHF-së, Idrizi është i bindur se ndryshimi do të vijë edhe në shkurt. "Për hair na qoftë. Erërat e marsit na i afruan një muaj para, mirë bënë. E dini atë historinë me plakat e marsit ju? Plakat e marsit na er- dhën në shkurt tani. Unë prisja plakat e marsit, për hair na qoftë. U uroj suksese kandidatëve. Dihet qëndrimi i Flamurtarit, pasi ka qenë i deklaruar disa herë publikisht. Nuk kemi çfarë të komentojmë më për këtë çështje. Erërat e reja erdhën në shkurt", tha Idrizi. GJYQI ME FSHF
Por, zgjedhjet janë vetëm njëra anë e medaljes. Sinan Idrizi ka gati dosjen dhe me drejtuesit aktualë të FSHFsë do të takohet në gjyq. Qëndrimin e tij, administratori e bëri publik edhe dje gjatë prononcimit të dhënë për "Panorama Sport". "Është gati dosja. Brenda këtyre ditëve do të hedhim në gjyq FSHF-në, e cila legalizoi informalitetin në futboll. Ne vjet jemi dënuar nga FSHFja me heqje pikësh, për shkak të ilegalitetit që ne donim të luftonim. Dosja është e plotë me faturat që jemi ndëshkuar ne, me pagesat që kemi bërë ne që nuk kanë qenë tonat që nga Ardian Nini, Shkëlqim Muça, Rubio, tek Edmond Lutaj. Kjo për tekat e dikujt që shikonte ëndrra me sy hapur dhe e mbante veten si i plotfuqishmi i qytetit dhe bënte çfarë i donte me këtë mall pa zot. Nga njëra anë ka qenë një Flamurtar që kishte fatura të rregullta tatimore, me lojtarë që paguheshin 1 milion lekë, dhe nga ana tjetër kemi pasur fatura të depozituara në FSHF të zotërisë që ishte ëndërrimtar i qytetit dhe e katandisi Flamurtarin në atë gjendje. Bashkë me këtë do të shikoni edhe evazionin e madh fiskal që është bërë te Flamurtari. Ekzistonte një Këshill Bashkiak që miratonte për klubin 400 milionë lekë ( të vjetër) dhe shpenzimet shkojnë 1.2 miliardë lekë dhe askush nuk kërkon llogari ku janë gjetur këta 700-800 milionë lekë të tjera që ka pasur në fatura, atëherë ky është një problem tjetër. Por FSHF këto i njihte. Ndaj tani me të do të takohemi në gjyq", u shpreh Idrizi.
DY KONTRATAT
Për Sinan Idrizin, të gjithë kanë qenë me dy kontrata te Flamurtari në kohën kur klubi administrohej nga bashkia. Jo vetëm Ernest Gjoka, por me dy kontrata te Flamurtari kanë qenë edhe ish- trajneri Edmond Lutaj dhe disa futbollistë. "Ilegaliteti te Flamurtari nuk ka pasur kufij. Të gjithë kanë qenë me dy kontrata. Që nga trajnerët Lutaj e Gjoka e deri te lojtarët Bajevski e të tjerë. Pse nuk i hapi sytë FSHF-ja për këtë? Unë do t'i shkoj deri në fund. E kam thënë dhe po e përsëris, nga Kupat e Europës, nga 330 mijë eurot, janë qindra mijëra euro që kanë humbur rrugës. Ka ardhur vetëm 15% e shumës, pjesa tjetër nuk dihet ku ka shkuar. Është paguar një faturë kapriço 80 apo 97 mijë euro, në mos gaboj, për Edmond Lutajn, kur fatura reale e Lutajt në tatime nuk i kalonte 1 milion lekë (të vjetër) në muaj. Këtë faturë, 100 mijë euro, pse duhet ta mbajë në kurriz Flamurtari dhe pse nuk duhet ta mbajë përgjegjësi që e ka bërë këtë gjë? Pra, unë kam dosjen gati, jo vetëm për FSHF- në, por edhe për ata që kanë drejtuar Flamurtarin", përfundon Idrizi.