Ja kush janë anëtarët dhe votimi në Asamblenë e Përgjithshme të FSHF-së
Më 7 shkurt do të zhvillohen punimet për Asamblenë e Përgjithshme që këtë vit përkon me atë zgjedhore për Presidentin e FSHF-së dhe anëtarët e Komitetit Ekzekutiv. Në bazë të statutit të institucionit të futbollit në vend, për kandidimin në garën për kreun e institucionit të futbollit në vend duhet që secili prej kandidatëve të propozohet nga të paktën një prej anëtarëve, ndërkohë që fituesi zgjidhet me të paktën 44 vota që konsiderohet shumica e cilësuar. Në rast se mungon kjo gjë, atëherë në votimin e dytë përfshihen ata kandidatë që kanë marrë numrin më të madh të votave. Në këtë raund fiton kandidati me numrin më të madh të votave, pra, me shumicë të thjeshtë. ANËTARËT
Nga 66 anëtarët e Asamblesë, 54 janë klube futbolli dhe 12 shoqata sportive si, për shembull, Shoqata e Trajnerëve, e Mjekëve Sportivë, Arbitrave të Futbollit, etj. Por prej disa vitesh, disa klube kanë filluar të privatizohen duke ndryshuar statusin: nga publik, në privat. Format private të pronësisë janë shoqëri aksionere, sh.p.k. apo shoqata. Nga ana tjetër kemi ende klube në varësi të pushtetit lokal, pra, bashki që administrojnë ekipet e futbollit. Mirëpo, nisur nga menaxhimi i klubeve, mbetet e paqartë se sa është raporti mes klubeve private dhe atyre me varësi të plotë nga bashkia. Por, nëse politika do të donte të ndikonte në zgjedhjen e presidentit të Federatës, këtë mund ta bënte duke ndikuar drejtpërdrejt përfaqësuesit e klubeve që varen nga bashkitë, por edhe nëpërmjet presionit të biznesmenëve që janë aksionerë maxhoritarë në klubet private. Përmendja e emrit të deputetit socialist, Bashkim Fino, si një kandidaturë e sponsorizuar nga një klub futbolli, shton frikën e përfshirjes së politikës në një proces që duhet të mbetet tërësisht sportiv. Në vijim, mbetet për t'u parë se çfarë aktorësh zyrtarë do të ketë ky proces votimi dhe nëse përfshirja e politikës do të ketë ndikim në përzgjedhjen e kreut të Federatës Shqiptare të Futbollit.