Shtegu i gjelbër 2018, fitojnë Muliqi e Hasani
Veliaj: Ky do të jetë viti i biçikletave për qytetin e Tiranës
Për të tretin vit rad hazi në kryeqytet u zhvillua gara "Shtegu i Gjelbër". Nën kujdesin e Bashkisë së Tiranës dhe të Agjencisë së Parqeve dhe Rekreacionit, mbi 100 çiklistë amatorë dhe profesionistë, të apasionuar me natyrën dhe sportin, si dhe grupe të rinjsh vullnetarë, janë bërë pjesë e kësaj gare çiklistike. Në fund janë shpallur dhe fituesit, të cilët, përveç trofeut, kanë marrë edhe nga një shpërblim.
ITINERARI I GARËS - Edicioni i 3-të "Shtegu i Gjelbër" është përshkruar nga një itinerar prej 63 kilometrash, ku gjithçka ka nisur nga Sheshi "Skënderbe", përgjatë Bulevardit "Dëshmorët e Kombit" dhe ka vijuar nëpër Kodrat e Liqenit, drejt Kurorës së gjelbër të kryeqytetit dhe kanë mbërritur në Petrelë, ku ka qenë instaluar dhe stacioni "Check-point", apo stacioni i parë i kronometrimit. Stacioni i dytë ishte ai i Durishtit, i ndjekur më pas nga "Check-point"-i i kilometrit 25, përgjatë rrugës Tiranë-Elbasan, e më pas ka vijuar me stacionet e tjera të kronometrimit në Kakunjë, në Koçaj pranë Baldushkut, në Rodhje dhe është mbyllur kronometrimi në finishin e Mulletit, ndërsa mbërritja për publikun ka qenë sërish Sheshi "Skënderbe" në Tiranë. Sipërfaqja e garimit ka qenë e alternuar: argjilë, asfalt, çakëll, me bar, dheu apo përzierjet e ndryshme të këtyre elementëve, ndërsa lartësia e garimit është luhatur nga 100 në 2000, në 400 e deri mbi 800 metra mbi nivelin e detit, duke përkuar me "Check-point"-in e 3-të, atë të km 25 në Qafë-Kërrabë. Për organizatorët e kësaj gare të çiklo- krosit, Fondacionin EDS, biçikleta është një zgjidhje e shëndetshme në një qytet me një trafik të rënduar si Tirana. E, për këtë arsye, "Shtegu i Gjelbër" është më shumë sesa thjesht një garë.
KRYEBASHKIAKU KRYEQYTETAS - Kësaj gare i është bashkuar dhe vetë kryetari i Bashkisë së Tiranës, Erion Veliaj, i cili në nisje të saj tha aktiviteti sportiv synon ndërgjegjësimin e qytetarëve se biçikleta është një zgjidhje e shëndetshme në një qytet si Tirana. Veliaj theksoi se tashmë kjo garë është kthyer në një traditë të bukur për kryeqytetin, duke e përfshirë Tiranën në kalendarin e të apasionuarve pas këtij sporti. "Më vjen mirë që jeni regjistruar rreth 100 profesionistë. Besoj se është mënyra fantastike për të inkurajuar, jo vetëm ata që janë profesionistë, por edhe ata si puna ime që janë amatorë", deklaroi Veliaj. Duke inkurajuar të rinjtë, ai më tej ka thënë: "Është momenti ideal, ku secili të vendosë që 2018 mund të jetë një vit fantastik për t'u marrë me sport. Mund të jetë çiklizmi në natyrë, mund të jetë çiklizmi në rrugë, mund të jetë maratona, mund të jetë një
sport. Problemi numër 1 i qyteteve për shëndetin është obeziteti dhe fakti që ushqehemi keq, kemi jetë sedentare".
GARA - Për të gjithë të apasionuarit, kjo garë "Cross Country" ka bërë bashkë një numër të madh çiklistësh duke filluar nga amatorët, profesionistët e grupmoshave të ndryshme. Një garë plot emocione, surpriza, vështirësi e probleme në një terren të vështirë malor. Por gjatë saj ka pasur dhe probleme, për shkak të mungesës së sinjalistikës, duke bërë që çiklistët të humbnin dhe rrugën. Pas organizimit të kësaj gare, më të madhes në Shqipëri, ka qëndruar një staf i madh nga Shoqata e Çiklistëve, Bashkia e Tiranës dhe Federata Shqiptare e Çiklizmit. Kryeorganizatori
Edvin Kasimati, para nisjes së garës, u shpreh: "Ne do të përdorim një pjesë të rrugës për të bërë garën, që në njëfarë mënyre krijon edhe këtë emrin 'Shtegu i Gjelbër'. Kjo garë ka 100 pjesëmarrës, një numër shumë i madh për skenën shqiptare të çiklizmit dhe të sportit. Ne jemi 25 persona që marrim pjesë në staf, plus pjesën e mediatizimit, gara mund të ndiqet edhe në internet. Kjo është pa diskutim gara më e madhe që zhvillohet në Shqipëri për të tretin vit radhazi", vuri në dukje Edvin Kasimati. Në përfundim të garës u shpallën dhe fituesit. Në vendin e parë u rendit malazezi Demir Muliç me kohën 2 orë, 50 minuta e 52 sekonda për të rriturit dhe për të rinjtë u shpall kosovari nga Trepça e Mitrovicës, Samir Hasani.