Mbrojtja, Vllaznia ndryshon stil
Ergis Mersini shumë pranë firmës, synohet edhe Gëzim Krasniqi i Partizanit
Merkato e Vllaznisë pritet të mos nda let pas dy afrimeve të bëra deri më tani. Kjo do të thotë se Xhevahir Sukaj e Sedat Berisha nuk do të jenë të vetmit që do t'u bashkohen kuqebluve këtë janar. Drejtuesit e klubit në bashkëpunim me stafin teknik janë duke parë mundësinë për të sjellë në skuadër edhe ndonjë futbollist tjetër, kryesisht për repartin e mbrojtjes. Deri më tani, ata kanë parë disa opsione për futbollistë të huaj, por me sa duket ato janë fokusuar te lojtarët vendës që janë lënë të lirë nga ekipet e tyre dhe mund të afrohen me parametra zero për të forcuar mbrojtjen. Përveç Ivan Jakoljeviçit, të tjerë emra kanë dalë në skenë si përforcime të mundshme. Ergis Mersini dhe Gëzim Krasniqi janë në objektivat e kuqebluve, madje për gjirokastritin mund të thuhet se është shumë pranë firmës me kuqeblutë. Ndërsa për ish-mbrojtësin e Partizanit, shkodranët janë interesuar edhe më parë, por transferimi nuk u realizua. Gjithsesi, gjërat tani kanë ndryshuar dhe mund të ketë ndonjë finalizim. Gjithsesi, duhet pritur edhe pak ditë për të parë se kush do të jetë blerja e tretë e Vllaznisë. Nuk përjashtohet mundësia që ai të jetë sërish i huaj. Drejtuesit janë duke u treguar shumë të matur në
merkato për të mos përsëritur gabimet e bëra në të kaluarën. Kjo do të bëjë që në fushë të shihet një skuadër e ndryshme nga ajo e gjysmës së parë të sezonit.
Orelesi - Afrimet me Berishën për qendrën e mbrojtjes, por edhe të ndonjë lojtari tjetër
në këtë pozicion, do të bëjnë që tekniku Gjoka të rishikojë vendin e Orelesit në fushë. Një gjë të tillë tekniku mund ta bëjë edhe pas rikthimit nga dëmtimi i Pjeshkës. Me sa duket, Gjoka do të bëjë të mundur që Orelesi të kalojë në mesfushë, ku ka edhe pozicionin e tij natyral. Për nevoja të ekipit ai ka sakrifikuar deri më tani dhe është vendosur në qendër të mbrojtjes. Një gjë e tillë do të sjellë edhe konkurrencë për qendrën e mesfushës, pasi ka disa lojtarë që pretendojnë për të pasur një vend në formacion. Gjithsesi, rëndësi ka fakti që Vllaznia do të ketë lojtarë cilësorë para mbrojtjes, për të thyer aksionet e kundërshtarëve dhe ndërtuar të tyret. Trajneri Gjoka duket i kënaqur me zgjidhjen që i është dhënë repartit të mbrojtjes, ndërsa Orelesi mund të konsiderohet edhe si një blerje e re në merkato.